Jowai : Neidaw wym lai bait lai ryntih wei wym em man che i thung kaam ya ki khon khynroo Khyllood ka bri u Ynniaw Wasa ki wa da biang ki kyrdan puræ ha ki eksaam ka DSC, MPSC ha ki tnat wapher wapher ki tnat sorkar kamjooh ha ki company wapher wapher ki wa em hapoh jylla yong i.
Ha ka 6 tarik uni u bnai 2016 da pynman ya ka yalang ha Khliehriat heiwa boon ki khynroo khyllood da wan ki cha khmat yow pynsniaw yei wym sñiawhun ki ya ki eksaam wa pynman da ka DSC, MPSC, MeECL, NEEPCO, PHE, PWD, Health, Transport, Education, Border Area Development wa kiwi kiwi. Kamjooh leh da em boon ki ujor ki paidbah ha katai ka yalang hei yatoh wa kiwa boon ki Cement Plant ki wa em hapoh East Jaintia Hills neibhah ym em yoo khooid i rukom thung kaam kamjooh ya ka tulop ym em ryngkat wa ki bru tre chnong wa kiwa wan na bar jylla.
Da em leh ki wa wanrah yeiwa chem yong ki hei pyrchang u yieñ hei yong ki hi ki kjat kam ki nong chalan mooyong, moochuni wa kiwi ki mar cha ki Cement Plant neidaw wa ah ki kat wa ngait ki yei dor u mooyong ym em su katkam i dor wa da booh wei haap yang da ki bnai yow yoh ya ka poisa wei kamjooh leh em ki wa haap yang da ki snem.
Da chem i jooh iwa da jia ya ki wa dai moochuni cha kini ki cement plant najrong i dor wa khian wa booh kitai ki company tangwa ym dam ki u khate dor.
Em leh ki kattu katni wa kreh kam ki kontraktor ha kini ki kompany ki leh maad ki kamjooh hi. Da pyntip chooh ha kani ka yalang wa i kreh man i waroh 24 kynta chi sngi wei kamjooh waroh chi tayaw tangwa kat yei su da haap yang da ki bnai.
Kamtæ da iwi i jingmut ha katai ka yalang da chim ya ka rai wow chna noh da ka seiñ ka wow peitngor wei boodien ya kini kiyi kiyi waroh khnang wa ka mynstep mankawi ki khon khyroo khyllood ym man ki iwa sepai.
Da e pyrtuid ya kani ka seiñ ka “Hynniewtrep Association of Unemployed Youth and Labour” wei ya ka ktien im sngi (motto) toh da booh “Make A Difference” (Yow wanrah yei kylla).
Da jied ya ki nongyalam kamni næ President – ma K.C. Rymbai, Vice President – ma J. Sumer, Genl.Secretary – ma B.B. Wann, Asst.Secretary – kong E. Rymbai, Education Secy – kong P. Pamthied, Publicity Secy – ma L. Dkhar, deilang wa ki 28 ngut ki dkhot kiwa emlang ha katai ka sngi.
Kamtæ ka seiñ khut sniawbha wei kyrpad ko ya waroh ki khon ka bri u Hynniawtrep kiwa da pass ya ki puræ wapher wapher nadooh Medical, Engineering, Management, BSc, BCom, BA wa kiwi ki wym pu yoh kaam yoh jaam kamjooh leh kiwa dang puræ wa kiwa kreh ya ki yong ki hi ki kaam yow man dkhot lang ki ha kani ka seiñ.
Discussion about this post