Jowai: katwa kiwa boon ki khon ka chnong Jowai sñiawsuk wei ka-it ki u pynwyrngia cha Treriat dei lai khwe wei uiñke wow pait yei jæd i pra wei tngit i jakhlia wa dap wa chlai lynter ki bynta ka Treriat, ki ar ngut ki khynroo ka chnong Jowai wa kynthup yow D. Gatphoh wow D. Rymbai dei pisa langa wei sñiawkhia yei dap i chlai ki plastic ha ki bynta ka Treriat iwa da wanrah yei sihdur wei pyndooh yei miat yoosuk i man ka Bei Rymaw.
Kini ki khynroo ha kani ka sien da yoohkjat ki ha Syntu Ksiar ynne ka sngi Thymblein 31 tarik Naisan 2020 deiwa pynlang ya ki plastic wei pynkhooid ya ki jhep ki jakhlia wasah ha chilynter ka Ban Syntu Ksiar.
Katwa kini ki khynroo dang wyrngia ki hei pynkhooid, hadien kiwi won ki khynroo wa lai cha kani ka thaw kiwa em i jooh i sñiaw yeini i man ki bynta ka Treriat da yaksoohktilang ki neibynta ini i thmu wa bha.
Ini i kaam wa leh kini ki khynroo ka chnong Jowai ha kani ka sngi toh iwa khian wei iwa emkaam bha khamtam ha kam ini i por iwa yoo wa lynter ki bynta ka Treriat wa ki rood ka wah Myntdu man ki kiwa dap wa chali sadu ki jhep ki plastic wa tawah tasbah kiwa pynsihdur yei miat yoosuk ki bynta ka Treriat wei man ka Bei Rymaaw.
Hei yaklam wa uwi na ki khynroo da ong u wa ha ki sngi wow wan daw pteiñ chooh ki yeini i kaam. Yooluti wa kiwi ki lok wa chong chnong ka Jowai u bood late ki yeini neibhah ka por dawa ko ya i waroh wow leh yeini neibynta i khooid i pliah ki bynta ka Treriat wei miat yirngam ka Rymaw.
Discussion about this post