Jowai: Kam chibynta wow pdiang ya kiwa wan cha ka NH7 Weekender ka wow pynman ha kani ka 2 wa 3 tarik ha Thadlaskeiñ, Lad Mukhla, ka District Legal Services Authority (DLSA) deilang wa ki pulit ka West Jaiñtia Hills da pynman ki ya ka pynkhooid ya ki thaw wa em chajan i thaw wow pynman ya kani ka tamasa.
Ha kani ka pynkhooid yonglang kawa pynman ynne i step da wan chimbynta da ki khynnah skur ka JNV Mukhla, ka ATS, ka Kiang Nangbah LP&UP School, Mukhla hei emlang u waheh chnong ka Mukhla waka Lad Mukhla.
Ha chwa wow sdang yei pynkhooid da em ka yalang wa tbian heiwa da yaklam yei emkaam u man kiwa lehkhooid kawa pynlai da u Insp. DH Pde In-charge Jowai Traffic wei da yoh yei klam na u DSP J. Marngar, MPS u waheh chnong ka Lad Mukhla, u D Marbaniang Secretary ka DLSA wa kawi kawa mihkhmat kiwa pynman ya ka NH7.
Kani kawa mihkhmat ka NH7 da khana ko wa waroh ki jhep ki wow mih na kani ka tamasa daw pyllang ya ki wei daw phah recycle ki yow lait i u neh ha kani ka thaw wa pynman ya kani ka tamasa.
Ki bynta wa pynkhooid ha kani ka sngi toh nadooh Orchid Inn chadooh ka Mukhla Petrol Pump da ki khynnah ka JNV School, nadooh na Orchid Inn chadooh hadooh wow poi ATS da pynkhooid da ki khynnah ka ATS katwa nadooh na Orchid i bynta wa 1km ka Jowai Bypass da pynkhooid da ki khynnah ka Kiang Nangbah LP&UP School, Mukhla.
Ya i jhep da kit da ki pulit ka Jowai Traffic wei da booh leh ya ki tin pyllang jhep cha kini ki thaw wa da dep pynkhooid.
Discussion about this post