U MLA ka Voice of the People Party (VPP), u Ardent Miller Basaiawmoit da pynkhih u ya ka sngi sdang ka dorbar mang tangka deiwa pyrchah yei klam u Lat (Governor’s Address) neidaw wa klam u da i ktien Hindi, ini da pynman leh ya waroh 4 ngut ki MLA ka VPP wow mih ki napoh ka yung dorbar.
U Lat ka jylla, u Phagu Chauhan da e u yei klam hapoh ka yung dorbar da ka ktien Hindi, iwa da pynman ya u Ardent wow yieñ yow pyrchah neidaw wym sñiawthooh yei klam, heiwa da kdaw leh wa ka kyndon hapoh ka yung dorbar da klam che wow klam bait da ka ktien kawa ye u sñiawthooh lang kawa man da ka ktien English kamwa da jooh leh barabor.
Neidaw ini i pyrchah, da yieñ u Montri Rangbah ka jylla, u Conrad K Sangma wow pynsñiawthooh wa ki kyndon chah ki ya u Lat wow klam da ka ktien Hindi neibhah yei klam waroh da booh ha ka miej ha ka ktien English kawa da ye wow sñiawthooh lang.
Neiliang u Lamphang ka yung dorbar chna aiñ, u Thomas A Sangma leh da e laad u ya u Lat wow e yei klam bait da ka ktien Hindi.
Yow pyrchah ya ini i klam yong u Lat da ka Hindi neiliang u Ardent deilang wa 3 ngut ki MLA ka VPP da mih noh ki napoh ka dorbar kam ka dak wow pyrchah ya ini i klam dei Hindi.
U Ardent da ong u wa ki burom ki ya ki paidbah wa jied ya ki wei wow klam dei ktien Hindi man ko leh pyrchah yei sñiaw ki paidbah wei da beiñ u leh ya u Lat wa klam u dei ktien Hindi ka ktien wym sñiawthooh ki paidbah iwa da man kam wow pynbor ka sorkar ya ki bru wow klam Hindi.
