Ka KSU-East Jaiñtia Hills District Unit ynne deilang wa ki paidbah, u Waheh Chong ka Sonapyrdi, u Waheh Chnong ka Tongseng Narpuh, u Waheh Chnong ka Umstain, u Secretary Chnong ka Hingaria wa kiwi de da lai toor ki cha ka thaw wa em ki BSF ha yingkieñ Sonapyrdi yow pynsñiaw yei kot i kdang yei chah pyndik, chah tba kti wei chah pynmynsoo ki paidbah hei kti ki BSF iwa da jia man-i-por.
U Waheh Chnong ka Sonapyrdi, u E. Lamare hawa yania wa ki BSF da kylli u na ki wa lada yoh NOC ki namo ym em wow chong ha kani ka thaw wei ini toh ka maham wa khaddooh lada jia biang kam ini neini chakhmat daw leh dei kaam. Wei lada ym kyrriah ki na ini thaw nadooh mynstep daw lai cha u DC wa ki pulit yow leh ki yeiwa emkaam.
Da kylli u leh na ki BSF iyi leh ki paidbah ya ki wei kammon sang ym sarom ki u leh ya kini ki kaam wow pyndik paidbah.
U K. Suchiang, General Secretary ka KSU-East Jaiñtia Hills District Unit da pynkynmoo u ya kiwa boon kiwa da chah tba kti chah dat nadooh ki khynnah skur hadooh ki manbei heiwa wot ki mar wa kit ki bru nadooh u khoo da jhieh da sepai u neidaw wa chah khyndang ha ki BSF.
Da ong u leh wa dang mut wa ki BSF toh kiwa yada tangwa da man pathan kiwa da booh hei maa ya ki paidbah deiwa kylli leh iyi leh ki yei psiah tooh ki Bangladesh kiwa da pynyap ya ki bru yong i, wei i thaw ki BSF toh cha khappood yow pait ya u pood ymtoh chapoh ki chnong ki thaw.
Kamtæ da kyntu yaka sorkar wow kyrriah noh ya kini ki BSF na kani ka thaw.
Ha kani ka sngi da emlang leh waka manbei kawa da maad yei neh neiwa leh ki BSF.
Discussion about this post