theme-sticky-logo-alt
theme-logo-alt
Advertisement ad1
Advertisement ad1

Mih ki yakhih pyrchah ya ka Lockdown ha Europe

Advertisement ad1
Advertisement ad1

Ka ri Austria da pynkrehkaam ko ki kyndon Lockdown neibynta kitu ki wym pu yoh tika yada COVID-19 heiwa ym chah ya ki wow mih cha lait 10 sngi kiwa em 12 snem chaneiñ lait nei wow lai skur, lai kreh, lai sumaar iwa mut wa u lai baam lai dih, lai leh muja toh iwa da khang ya ki wym pu em yoh tika.

Yeini da leh kam chibynta wow yaleh pyrchah yei ku kiwa yabi ya u khñiang khlam ha kini ki ar tayaw iwa ku da 134% iwa da poi hadooh 11,000 ngut kiwa dang yoh man-ka-sng.

Advertisement ad1

Kiwa da yoh tika ha Austria da em ki 65% iwa mut 8.9 Million iwa man leh iwa duna dooh ha ki thaaiñ sep-sngi ka Europe.

U Chancellor Alexander Schallenberg da pyntip u wa 83% na ki wym pu em yoh tika toh kiwa chitom hadien wa yoh ya u khñiang khlam.

Kini ki kyndon da pynmam ko ya ki paidbah wow mih ki da ki hajar ngut ha nongbah Vienna, Austria heiwa da mih i yaleh haprdi ki pulit heiwa ki paidbah da ong ki wa da chah ktah i hok manbru ki wow jied lada kwah namo ym kwah ki yei tika neibhah wa hapoh Austria nadooh u 2022 ka sorkar da thmu ko wow pynman wym hoi de u dam u chim tika.

Hapoh ka ri Netherlands leh da sdang ko wow pynkrehkaam ya ka Lockdown kawa malu mala ya kitu ki wym pu em yoh tika iwa da wanrah yei mih ki paidbah wow pyrchah hapoh ka chnong Hague hadien wa ka Lockdown wa malu mala da poi ko cha 3 tayaw heiwa da thmu leh wow khang ya kitu ki wym pu em yoh tika wow psiah ki cha ki kattu katni ki thaw paidbah.

Ki yakhih ki paidbah toh kawa joor bha heiwa da mynsoo 5 ngut ki pulit hadien wa ki paidbah da thang ki da ki bomkala, da thang diñ wei da kawang moo ki leh.

Ki paidbah hapoh ka Netherlands da mih ki wow pyrchah ha Amsterdam, Rotterdam, ha Urk wa kiwi de ki chnong wa em hapoh ka Limburg Province.

Ha Croatia leh da mih i pyrchah ki paidbah ha Zagreb hadien wa ka sorkar da pynbna ko du kitu kiwa em Covid Passport kiwa ye wow psiah cha ki thaw paidbah wa ki yung sorkar.

Ha Belgium leh da jia i jooh heiwa ki paidbah da pyrchah ki yei pynemkaam ya ki Covid Pass yow ye u psiah cha ki Café, Restaurant wa ki Cinema.

Ka ri Germany leh da maham ko wow pynkrehkaam da ka Lockdown hadien wa ku kiwa dang yoh cha 42,000 ngut.

Share this:
Previous

Ha u Montri ka puræ puthi ka India kyntu u Conrad wow tipmit yei ktien Khasi wa Garo

Next

COVID-19: Hiar kiwa dang chah ktah hapoh 1.20 lak ngut ha India iwa duna dooh hadien 534 sngi