Jowai: U Anu Malik da mih noh u naka Indian Idol 11 hadien wa ka National Commission for Women phah Notice ko cha ka Sony TV. U Anu Malik da man u kam uwi na kiwa chah pynbaad haka #MeToo heiwa kiwa boon ki kynthai ha kylleiñ ka pyrthai da wan ki chakhmat wow khana yei chah thombor ki ha ki chynrang deiwa pynemkaam yaka #MeToo ha ki Social Media.
Ka Sony TV da pyntikna ko wa u Anu Malik ym man de u kam uwa bichaar yaka Indian Idol 11 hadien wa yoh ko yaka Notice naka National Commission for Women.
Ini da jia i hadien wa kawi kawa rwai kawa tip kam ka Sona Mohapatra da thoh (Open Letter) ko cha ka Smriti Irani kawa man kam ka Minister of Women and Child Development.
Haka Notice da pynmih leh yei pyrtuid ka Sona Mohapatra wei da paan pynche naka Sony TV iyi leh ki hadien wa da mih boon ki kynthai kiwa pynbaad ya u Anu Malik wa da leh u ki kaam khlemakor ya ki, deiwa kylli leh kammon dang yoh u man kam uwa bichaar yaka prokram TV wa pait kiwa boon ki khynroo khyllood. Ya kani ka Notice da phah cha u Rohit Gupta, President ka Sony Entertainment Television.
Neiliang u Anu Malik da ong u wa ini i chah pynbaad u toh i thok i chukor suda wei da ktah joor ko ya oo wei kwah u yei bichaar wa hok.
Discussion about this post