Hadien i yohkem ki pulit ya u I Love You Talang uwa da suba emkti hei kaam pynyap bru, ynne ka sngi neiliang kiwa chong chnong ka Moorap, West Jaiñtia Hills kawa toh ka chnong u I Love You, da ya mih paidbah ki wow pyrchah yei kaam dusmon yong oo deiwa rahlang wa ki kot rben wa em ya ki kyntien pynrem joor wei dawa yaki bor ka aiñ wow set patok chi rta lane wow pasi, khnang yow chngaaiñ ka imlang sahlang, wei da ong leh wym pdiang ki wow em kam kini ki jaitbru wa sih hapoh ka chnong ka thaw.
“Da sñiaw sarom i neibhah kat chawa lai wa wan neh i naam wa ki Moorap toh kiwa tynyap bru, ini da pynsñiawsih ko ya i kam ka chnong wei wym ye i u pdiang ya kam kini ki jaitbru,” ong u Waheh Chnong ka Moorap, u Standly Ryngkhlem.
Khana u wa ya u I Love You da kha wei heh u ha chnong Moorap, tangwa haki 5 snem boon wym rap poi chnong de u. Kamtæ kam ka dak u pyrchah yei kaam dusmon yong oo, ka chnong da rai ko u mih paidbah deiwa pynrem joor wei dawa yaki bor sorkar wow kset patok chi rta.
U Secretary ka Moorap, u Thadius Phalangki ong u wa i leh yong oo da wanrah ko i sñiawsih yaka chnong ka thaw, wei mih i yaam i ksaaid hapoh ka yung ka sem waka kur ka jait yong oo lyngba ki kam pynsih dur yong oo yaka chongsuk chong chngaaiñ.
Kamtæ kam ka chnong da pyrkhat wei chong dorbar wow pynsñiaw yei pyrchah wei heiyatoh wow pyndooh pyndam syndon ya kam kini ki jaitbru hapoh ka chnong ka thaw, ka District waka jylla waroh kawi.
“Khyrngiat i hawa mih ka khubor wa uni u bru toh uwa naka chnong yong i, tangwa kmen won i heijooh i por wa ki pulit da yoh kem ki oo,” da ong kiwa yahkhmat ka chnong.
Heijooh i por da kyrpaad haroh ki ya kiwon kiwon wa emyatoh, kiwa hayung hasem yong oo, ki lok yong oo wym hoi hi wot u li bah jamin ki oo.
Neiliang ka kur Talang wa dang emyatoh wa u I Love You leh pynsñiaw ki i sñiawsih wei pynrem joor ki ya oo neibhah wa leh ya ki kaam wa ka imlang sahlang wym ye ko u pdiang.
