Jowai: Kiwa chong chnong ka dong Salini Colony, Mihmyntdu ynne i step da ya mih paidbah yonglang ki kynthai wa chynrang yow pynkhooid yaki sarok ki luti syngkieñ hapoh ka dong ka chnat nalor wow puchara chuni, hei yahkhmat ki waheh ka dong wa kynthup ya u Phermon Suchen Waheh Dong, u W. Pohthmi Secretary wa kiwi.
Neiliang u Phermon Suchen Waheh Dong pyntip u wa ini i pynkhooid dong ym toh de iwa dang thymme, tangwa man-u-snem da jooh leh kamwa arsien chi snem itæ toh chwa ka Behdieñkhlam wei chwa Christmas.
Ini i pynkhooid dong yong ki man ko leh chibynta wow wanrah yei khooid i jngiar kawa man kawi naka thong wa emkaam tam haka imlang sahlang.
Heijooh i por pyntip u leh wa kam ini i jait ya mih paidbah da leh ym du hei pynkhooid chnong, tangwa wot hei wow pynchna pynmiat ya u sarok, ki luti wa kiwi neibhah wa hadooh kamwa man katni ym pu jooh em yoh yarap ki kawon kawon ka Scheme sorkar.
