15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Chah ah ki dieñ wei pynkylla thaw rep saroo ki bru yaka khloo wa pait ka JHADC

Advertisement ad1

Ka Dorbar Chnong Namdong-A lyngba kani ka khubor, kiwa chong chnong da beiñ joor ki ya ka JHADC Jowai hajrong wym ye ko wow sumaar ya ki khloo ki kjam kiwa em ha Thadmynri (Elaka Nongjngi) iwa ka Dorbar Chnong da e sñiawbha ko cha ka JHADC neibynta wow sumaar ya ki dieñ ki seij ha kani ka thaw.

Da ong wa ka JHADC kamwa man kattæ nalor i tlot wa i wym ye u pynkrehkaam ya ki aiñ ha i rukom wa toh, neiliang yong ka chnong hadien wa da yoo ko ya i chah pynsih kani ka khloo kawa da e sñiawbha cha ka JHADC ha u snem 2007, heiwa da chem yei ah tooh yaki dieñ (Sal) na kani ka khloo wei da yoh leh wow kem ya kini ki dieñ nadooh uni u snem wei da chem leh ya ini i ah dieñ wot hadien wa da booh ya ki maham, tangwa nadooh u snem 2014 ter ter hapoh i yahkhmat u Thombor Shiwat kam u CEM, da booh ki ya i ujor cha ka yung krehkaam ka JHADC lyngba u CEM wa ka chnat Forest tangwa ki ujor da man kamke wei kamwa da chem katni wa kani ka thaw da kylla ko kam ka kpær saroo yong ki kattu katni ki bru wa chim kabu kiwa da pam roi ya ki dieñ ki siej wa kiwa da thang dusmon ya kani ka thaw neibynta wow rep saroo kawa man pyrchah ya ka aiñ yong ka chnat khloo.

Ini i wym chimkhia ka JHADC da pynjæd ko ya ka rymaw wei da pyndooh nong leh ya ka JHADC wei ha i jooh i por ym man de ko katkam i yakut wa ka chnong namo ka Agreement hapyrdi ka chnong Namdong, Elaka Nongjngi wa ka JHADC lyngba ka chnat Forest ha ka 05-07-1980 ya ka thaw wa heh hadooh 394.27 Hectares.

Da ong leh wa hei yong sakhiat, ka JHADC du na kani ka khloo ye ko wow kamai da ki klur tyngka lada pynemkaam hok ya kani ka khloo kamwa da ya kut wa ka Dorbar Chnong Namdong.

Ka chnong Namdong-A da pyntip ko wa da krehlang ko wa ka JHADC hadien wa da e ya kani ka thaw wa i khloo wei ka chnat Forest da leh bha ko wei ki dieñ ki siej da heh da san bha ki tangwa ha kini ki 6-7 snem ki bru na ka chnong Thadmynri da sdang ki wow pam ya ki dieñ ki siej wei da sdang leh wow rep saroo tangwa neiliang ka Dorbar Chnong Namdong-A da ujor ko cha u CEM u Thombor Shiwat wa cha u Chief Forest Officer yong ka JHADC nadooh ka 24-09-15, tangwa ym em leh iyi iyi hajrong ini i ujor wei ki bru wa chim kabu leh nang yohbor ki wow pyjæd ya kani ka khloo.

Ka chnong Namdong-A hadien wym yoo ko ya ki dak na ka JHADC, da phah biang ya ka ujor hajrong ini ha ka 24-01-2017, tangwa sa chisien ym leh iyi iyi leh. Kamtæ da dawa na ka JHADC wow pynemkaam hok ya kani ka thaw wei lada ym ye wow leh ya ini, ka chnong daw chimkti biang ko ya kani ka thaw neibynta wow sumaar ya kini ki dieñ ki siej ha kani ka thaw.

Ka chnong leh da rai ko wow pyndooh pyndam noh ya ki bru kiwa rep ha kani ka thaw wei wow sdang biang wow pynheh ya ki dieñ ki siej lyngba ka bor chnong.

Ka khubor wa da phah da u Elias Susngi, uwa chong chnog yong ka Namdong lyngba i sur yong ka Dorbar Chnong waroh kawi.

Share this:
Previous

Angnood ka Salini Colony wow yoh i tipmit kam ka Dorbar Chnong

Next

Mih paidbah ka Salini Colony hei pynkhooid dong