theme-sticky-logo-alt
theme-logo-alt
Advertisement ad1

Mih pyrchah ka yung u (L)T. Suchiang yei pynman Interview ya kiwa sikai ha Sawlyngdoh HSS Mowkaiaw

Advertisement ad1

Ynne ka sngi kawa man ka sngi khut pynman Interview ya artylli ki Post sikai ha skur Sawlyngdoh Higher Secondary School Mowkaiaw, kiwa hayung hasem u (L) Thomlin Suchiang uwa sdang ya kani ka skur da ya mih ki ha pchem kani ka skur haphrang u mot sahnaam u pa yong ki wow dawa pyndam ya kani ka Interview deiwa rah lang ki lama rong yong wa Placard wada thoh yaki kyntien “Ngi khlem pyrshah iaka SMC, ngi pyrshah ia u Secretary iaki kam leh donbor jingñiew beiñ iaka ïing ka sem jong ngi bad jingbym kheiñ snep iaki kam u nongseng ka skul. Ngi dawa ban pyndam noh ia kane ka Interview.”

U Pynbiangmi Laloo, dkhot ka SMC uwa man leh u khon u (L) Thomlin Suchiang ong u, i daw wa pyrchah ki toh wa boon ki kaam wa u Secretary leh pyrchah bait u yei yi wa e yumut u Chairman kamjooh ka SMC, wei heiyatoh wa i khut Application ya kiwa thap kreh kamjooh ka Interview wada pynman ynne ka sngi leh da pynbaad wada leh embor u Secretary khlem i mynjur ka SMC lane i tip u Chairman.

Hajrong i dawa yong ki u thung kreh kam kawa sikai yaka payu khian yong ki ka Ridalin Laloo ha kani ka skur, u Pynbiangmi ong u toh kawa da em hi haki kyndon krehkaam ka SMC wow e khih samen khamtam yaka khon khian uwa seiñ ya kani ka skur, kamtæ hadien wada lait artylli ki Post, neiliang ka yung da kyrpaad ko yaka SMC wow yang neibhah sa du kajiak por da ye hi ko u pyndep yaka B.Ed.

Kiwi won ki pynbaad ya u Secretary ka SMC da ong wa da e buit chwa haroh u heiyatoh ki yukylli chaki arngut kiwa yakhun kiwa oo da em yumut u wow thung ha kani ka skur kiwa man leh kiwa sikai wada dep thung chipor (Temporary) chwa u, najrong chwa wow thung Temporary yaki leh da yachem u sop sop wa ki bei ki pa yong ki.

“Kini kiyi kiyi waroh toh i yoobeiñ yaka yung ka sem yong i, neibhah da em leh kawa ha yung yong i wa kreh kam ka Peon ha kani ka skur kawa da toh u ku kyrdan LD, tangwa yaka leh da bichni adnood,” pynrap u Pynbiangmi.

Neiliang u Secretary SMC kani ka skur, u Dapbiang Lathong won pynche u wa heiyatoh wow khut Application wei pynman yaka Interview ynne ka sngi da leh dei rai ka SMC wym du oo samen.

“Yi yoh u ong hajrong i pyrchah yong ki neibhah nadooh wa sdang nga da ong oo yaka Ridalin wym kynnoh oo ya pha neibhah hei thooh khih te boi ma da nga leh i jooh hi, tangwa i eh lada yaklam mynkna ka SMC wa pha leh wym poi cheiwon cheiwon neibhah wa i em i haka bynta wow hap bichaar, hap lai katkam ki kyndon sorkar. Sñiawthooh hi wa kam kawa thooh kreh wym em de pyrkhat iyi iyi neibhah wa kwah bait u yoh,” ong u Dapbiang, Secretary SMC.

Ong u wa neiliang ka chnat puræ puthi leh da em ka kyndon wa la kammon kammon kiwa sikai toh u man kiwa da pyndep B.Ed, tangwa ka won ym pu em dep ko.

Heiyatoh wei thylli ki ar tylli ki Post, da khana u wa hadien wa dap chisnem tam ka SMC da chong pyrkhat ko neidaw wa yoo ko yei chitom kiwa sikai kamjooh i doohnong ki khynnah skur kamtæ da thung ya arngut kiwa sikai chipor ha kini ki kajiak bnai.

“Wym mut wa em kiwa sikai chipor te da biang, ka skur em ko hei maa neibhah ya kiwa sikai haka Science Stream da su daka poisa skur. Wei lada yang bait yaka Ridalin leh i dooh nong u man ko ya ki khynnah neibhah dang slem por hadooh u pyndep ko ya ka Exam, u yang ya ka Result wei yoh ya ki kot ki sla. Kamtæ khnang yow lait nei chah ktah da khut pynman noh ya kani ka Interview”.

Hajrong i pyrchah yong ki, ong u wym ye u khang, wym ye u pdiang, ka bor wa khaddooh chong ha ka DSEO.

“Wym toh wa yoobeiñ yaka yung ka sem yong ki, tangwa chaka yung krehkaam ka DSEO leh da jooh yaklam toh wym pu em dep B.Ed ko, hanla kattæ leh kamwa man katni ka payu tre yong ka leh toh kawa dang kreh ha kani ka skur kamjooh u payu ar bei wa u kurim ko, da pyntip u Secretary SMC.

Heiyatoh won wei pynlai bait ya kani ka Interview ynne ka sngi, u Pynbiangmi Laloo da booh yukylli u deiwa ong, kamni khlem wan u Chairman ym toh u ye u pynlai du deiwa em u bru wa wan naka chnat sorkar, kani pynyoo wa ka SMC wym emkaam Chairman de ko, lane da man Chairman da ki bru sorkar.

Advertisement ad1
Share this:
Previous

2nd Division: Jop ka Lion ya ka West Madan

Next

Kyrpaad kiwa sikai Deficit Pattern ya ka sorkar wow kyruiñ leh cha i dawa yong ki