Jowai: Chibynta u yasaaid næ yakhun yei eh i khoo ki paidbah ka Ri-loom Jaiñtia heiyatoh i roi i paar haka imlang sahlang, ynne ka sngi hadien ka yalang yachem yumut hajrong ki daw wa khroo yong i eh i khoo ki paidbah wada pynman ha Chutwakhu Indoor Sport Hall, Jowai, kawi ka seiñ wa tip kam ka Jaiñtia People Welfare Organisation (JPWO) da mih pyrthai ko dei angnood wow yakhun yei jinjar wa i chitom ki paidbah lyngba ki chnat krehkam sorkar waphær waphær.
U Philemon Lyngdoh kam u Convener yong kani ka yalang hawa klam yahkhmat ong u, “Iwa pynman ya nga wow khut ya kani ka yalang toh manda pyrkhat O wa yoosar neidaw wym em kiwa yahkhmat, ki paidbah hun ki wow suki hi eh yei eh i khoo yong ki”.
Da e nongmuna haroh u kam i tympleh bordiñ khak khak hapoh chnong Jowai toh kawa ktah bha ya ki paidbah hei khih i khan, i kaam yung kaam sem wa kiwi, neibhah ha kini ki sngi kiwa boon hi ki emkaam u paidbah hap wow chaniah lyngba ka bordiñ.
Hawa kyruiñ u cha ka chnat saam umbaam umdih leh, ong u wa em ki thaw yoh umdih ki arsien chisngi, em kiwa yoh chisien chisngi wei em won ki wym yoh um tikna. Wei hajrong kini kiyi kiyi waroh, ki paidbah sah ki hei doom i langoh neibhah wym em wa yah luti yow thooh yei daw weileh jia kamni.
Heiyatoh won wei chait i khiah da kylli u deiwa ong, iyi waka sorkar da leh ko wow e yada ya ki paidbah khamtam ha kini ki sngi wa i poor u khñiang Coronavirus iwa dang ku ha kylleiñ ki ri ka pyrthai wa kynthup yaka ri India, hanla ka sorkar da phah ko ka khubor kammon wow yada leh, katwon hi eh u poi ko chaki chkoor kiwa dooh waduk ki nongkyndong, hei sakhiat hi toh u lai pynman ko dei pynche paidbah.
Nalor kini ki eh, kynthup haroh ki luti ki syngkieñ, wei heijooh i por i khang khayi dieñ, moo wa u mooyong ha ri-loom Jaiñtia iwa da ktah bha neibhah da man i im ja yong ki bru, khamtam lada pait yei rukom im cha nongkyndong man iwa yoo sah khonswet la kam wym em de wa pait wa yoo.
Da pynrap chooh chooh u deiwa ong, da yoo wa i man i long haka ri da kylla ko wei wym em de i chnongsuk chong chngaiñ kam haki por nachwa heiwa neipor cheipor mih ki eh wa boon rukom wei da yoo leh wada pyrchang wow pyndooh chooh chooh yei hok yong i.
Ha kani ka sngi da jied wei pynskem leh ya kiwa kitkam ka JPWO wa kynthup ya u Philemon Lyngdoh kam u President, Vice President u Bismall Myrten, Secretary u Russel Nongrum, Assistant Secretary u Ebor Sutnga, Finance Secretary ka Syrpaiwanka Laloo deilang wa 15 ngut ki Executive Member.
Discussion about this post