Ka 2 tarik uni u bnai man ko ka sngi ka wow sahkynmoo wei kawa kyrpang ya ka Ri-loom Jaiñtia wei khamtam ya ka Kiang Nangbah Government College, Jowai heiwa kawi na ki khynnah puræ da chah jied ko wow kynmoo warom ya kiwa yakhun laitlooid ka ri ha nongbah New Delhi.
Kani ka khynnah toh ka Sachita Syrti kawa na chnong Thangskai, East Jaiñtia Hills.
Ka Sachita da chah jied ko wow mihkhmat ya ka jylla hadien wa jop ko ya ka National Youth Parliament kawa man ha ki District wa ha ka kyrdan ka jylla wa da pynman ha ki bnai wa dadep.
Ya kani ka Youth Parliament da pynman da ka yung krehkaam ka Nehru Yuva Kendra, Jowai wei ha waroh kawi ka ri da em 35 ngut kiwa cha jied.
