Ka jhaad ki chipai duriaw ka ri, ka Indian Naval Ship (INS) Kesari ynnin da wanpoi biang ko ha Kochi hadien 55 sngi nadooh wa da em ko ha duriawbah Indian Ocean kam chibynta yong ka ‘Mission Sagar’.
Kani ka jhaad da pynkrehkama kyrpang ya ka neibynta ka ‘COVID Relief Mission’ wei da lai e yarap ko cha Male (Maldives), Port Louis (Mauritius), Antsiranana (Madagascar), Moroni (Comoros Islands) wa ha Port Victoria (Seychelles) heiwa da kit ko leh ya ki mar baam wa 580 ton chirup wa ki dawai dachin wow ekti cha ki bor sorkar kini ki ri.
Da kit ko leh ya ka dhab Naval Medical Assistance Team wa 14 ngut cha Mauritius wa Comoros neibynta 20 sngi wow yarap ya kini ki ri hei yakhun pyrchah ya ka khlam COVID-19.
Ini i lai e yarap man i leh kam chibynta yong ka thong krehkaam ka ri kawa tip kam ka ‘Mission Sagar’ heiwa ka India kwah ko wow pynyatohlok wa ki ri wa em ha kani ka duriawbah.
Neiliang u montri rangbahdooh ka Mauritius da ekhublei u ya u montri rangbahdooh ka ri hawa yaklam lyngba ka phone ha uni u bnai wa dadep khamtam hei kaam wa da leh da ka INS Kesari. Ki khlieh sorkar yong kini ki ri leh da ekhublei ki ya ka India yei yarap wa da e ko ya ki.
