Shillong: Ka Rangdajied United waka Druma Sandruma da pynkut ki ya ki yalehke Group Stage yong ki haka Meghalaya State League 2019 deiwa jop ya waroh ki soo tylli ki yalehke yong ki.
Ynne da sakhi ya ki yalehke wa khaddooh haka Group B wa C. Dang sah sa kawi ka yalehke haka Group D, katwa ka Group wa heh dooh ka Group A dang sah sa soo tylli ki yalehke.
Ha Mawkyrwat ka Rangdajied da jop ko 10-0 yaka Nongdaju Seng Samla haka Group C, heiwa u Donlad Diengdoh da thap u 5 tylli ki kool, wa ki ar kool na u Aenam Jyrwa wa u Stephanson Pale. U Samson Nongrum leh da yoh u wow thap chi kool ha kani ka jop wa heh dooh ka Rangdajied ha kani ka yakob.
Ka Khliehmawlieh Youth Club da jop ko yaka Madan Bynther da 5-0, u Kyntiew Myrthong da yoh u yaka Hat-trick waka chi kool na u Diverjohn Syiemlieh wa u Lerney Lyngdoh.
Ha Group B ha Khliehriat waroh ar tylli ki yalehke da kut ki khlem em wa jop. Ka Sutnga nyngkong da ya Drawn ko waka Jalaphet Bri-Sumer da 0-0, pynbood won saka 2-2 hapyrdi hapyrdi ka Iatyllilang Lumsehkot waka Umladkhur.
Haka Group D, ka Druma Sandruma pyrchah yaka Resu Conventus da kut ka kylla step khlem wa yoh thap kool tangwa ka Druma da pyntam ko da ar kool haka kylla miet na u Sengsu Momin wa u Misorsing Marak chwa wow su ka Resu lyngba u Jenjen Sangma kawa pynkut yaka yalehke da 2-1 yow e yei jop yaka Druma.
Ka Garo Warriors won da jop ko yaka 7 Wasa da 6-3. U Shiningstar Lamurong da thap kool nyngkong u yaka 7 Wasa haka minit wa 19 tangwa ka Warrior da pynyuiñ ko chi kool haka minit wa 40 kawa man leh ka kool wa nyngkong yong u Kunitson Marak ha kani ka yalehke wei kamtæ da kut ka kylla step da 1-1, haka kylla miet, ka Garo Warriors da thap ko sa 5 kool (sa le tylli na u Marak) yow yoh wa ar ki leh haka Group D.
Ki yalehke mynstep ka 7 tarik:
Group A (Jowai)-Lumniwar vs Lawbah (10:30am); Umkaber vs Umrit (1:30pm)
Discussion about this post