Shillong: Ka Meghalaya Democratic Alliance Co-ordination Committee da pynsñiaw ko yei wym sñiawsuk ya ka rai yong ka Union Cabinet ka sorkar National Democratic Alliance (NDA) wa yahkhmat da ka Bharatiya Janata Party (BJP) kawa da mynjur ya ka Citizenship Amendment Bill, wei kawa da thmu wow wanrah ha ka dorbar Parliament ha ka 9 tarik uni u bnai.
“Ka sorkar MDA waroh kawi ka pynsñiaw ko yei wym sñiawsuk wei yei wym hun ya ka rai yong ka sorkar pyrdi hajrong ka CAB,” da ong u Prestone Tynsong, u Dy. Chief Minister ka Meghalaya hawa yaklam wa ki laad pathai khubor.
Da pyntip u wa i yachem wa u Home Minister ka sorkar India, u Amit Shah ha ka 30 tarik, u bnai wa dep, ka sorkar Meghalaya deilang wa ki seiñ na ka jylla nadooh ki seiñbhalang wa kiwa pynlai chnong da pynsñiaw da iwi i sur ha u Amit Shah wa ym kwah ki yaka CAB ha kani ka jylla.
U Prestone da ong u wa daw thoh biang cha ka sorkar u Modi hajrong kani ka phang wei wow kyntu leh ya ka MP na Tura, ka Agatha Sangma wow kyrchaan ya ka sorkar jylla.
“I kyrpaad lang i ya ki MP na ka Congress wow kyrchaan ya i ha kani ka phang wa ym sñiawsuk yei rai yong ka sorkar India,” da ong u.
Da ong u leh wa i daw toh wa nadooh wa nyngkong i da pynsñiaw i cha ka sorkar India wa ym kwah i yaka CAB ha Meghalaya.”
U Prestone Tynsong da ong u hadien wa da yoo yei rai yong ka sorkar NDA, da yoo che wa da pynpsiah du chi lain, itæ toh wa ka jylla Meghalaya kawa em ya ka Sixth Schedule da pyllait du ya ki thaw wa haap hapoh ka Scheduled Area na ka CAB.
“Ki thaw ha Meghalaya kiwa haap hadooh kumba 96% ha ka Sixth Schedule, lada ye wow pyllait ya ka CAB na kini ki thaw wa em sa kamwa 4%,” da ong u Tynsong, deiwa pynrap leh wa ka sorkar India da toh u pyllait syndon bait ya ka Meghalaya na ka CAB.
Kam wow pynkynmoo wa ka sorkar Meghalaya Democratic Alliance (MDA) toh ka sorkar synrop yong waroh ki seiñ saiñ pyrthai lait noh ka Congress. Ya kani ka sorkar da yahkhmat da ka National People’s Party (NPP), deiwa kyrchaan lang ka United Democratic Party (UDP), Peoples’ Democratic Front (PDF), Bharatiya Janata Party (BJP), Khun Hynniewtrep National Awakening Movement (KHNAM), Nationalist Congress Party (NCP) wa ki MLA khlem seiñ.
Discussion about this post