MSL 5: Jop ka Khimusniang ya ka Mawshun

Ki yalehke ka 5^th Meghalaya State League da pteiñ ki ynne ka sngi da 7 tylli ki yalehke heiwa ka Langsning FC da jop ko ya ka Lawbah SC da 5-3 kawa da pynman ha Mairang.

U Nelson Rymbai (7′, 10′, 88′) da yoh Hat-Trick u ya ka Langsning katwa uwa yalehke ka Lawbah u Adonydevy Riwan (19′, 45’+1, 89′) leh da yoh Hat-Trick ha kani ka yalehke ka Group F. 

Kiwi de kiwa thap kool ya ka Langsning toh u Dajiedlang Wanshnong (33′) wa u Chusrang Sangma (42′). 

Ha ki yalehke wa da pynman ha Shillong won, ka Khimusniang SC da jop ko ya ka Mawshun SCC da 3-1 ha ka yalehke ka Group A wa da pynman ha SSA Stadium, katwa ka Mawlum Tyrsad SCC da jop ko da 4-2 ya ka Mulang SC Nangbah ha ka Group B wa da pynman ha madan ka MFA. 

Ka Mawshun da yoh ko wow thap nyngkong lyngba u Arkhangel Khongtyngkut (31′) tangwa ka Khimusniang da su kylliang ko hapoh ar minit lyngba u Civility Khongmalai (33′) wei da pyntam da u Primrose Lamat uwa da thap ha ka minit wa 65 wei da ban sa kawi da u Lamborki Lyngdoh (74′). 

Ka Mawlum Tyrsad won da thap ko le kool hapoh ki 22 minit lyngba u Banshem Khongsit (5′), u Marcellino Khongsit (11′) wa u Pyndapborlang Khongsit (22’P). Tangwa ka Mulang da ye ko wow pynuiñ ar kool heiwa kawi toh ka Own Goal lyngba u Bansamlang Nongbet (44′) wa kawi won lyngba u Woldrik Susngi (46′). Ya ka kool wa soo ka Tyrsad da thap da u Ebetstar Nongbet (88′) chwa wow kut ka yalehke. 

Ha Williamnagar wa pynman ya ka Group G, ka Maram FC da rem ko ha ka Janepih YSCA da 3-0. Wei ini man ko i sien wa nyngong wa rem ka Maram hadien le tylli ki yalehke, wei da ini ka Janepih leh da jop ko la ar sien. Ya ki kool da thap da u Edyson Iawphniaw (26′), u Alphascius Sangriang (30′) wa u Wankuparlang Khardiengngan (65′).

Related posts

MSL 5: Yoh ka Shkenshynriah u psiah Quarter

May 11, 2026

U-20 Men’s National Football C’ship 2026: Jop ka Meghalaya sa ya ka Jharkhand | Yoh Hat-Trick u Mebanlamlynti

May 11, 2026

Ha Mawkyrwat won, ka Mawten SC da jop ko ya ka Mawlarshong SC da 3-1 kawa man ka yalehke Group H. U Charles Lyngdoh (3′), u Oversharp Iawphniaw (57′) wa u Debenroy Thongnibah (90’+4) toh kiwa thap ya ka Mawten katwa u Hopefullness Wanniang (82′) da thap u ya ka Mawlarshong. 

Da em ar tylli ki yalehke kiwa khlem em wa thap kool kitæ ha Amlarem hapyrdi ka Amlarem SC wa ka Laskein SCSC ha ka yalehke Group C wei ha ka Group D ha Khliehriat hapyrdi ka Rymbai Shkenshynriah SC wa ka Thangskai Tiger SC. 

Mynstep daw em du kawi ka yalehke, katæ hapyrdi ka Attong Matgrik FC wa ka Balmanduri FC ha ka Group G ha Williamnagar kawa daw sdang heipor 3:00 waje i sngi.