Ka Mawlai SC kawa man kam ka Defending Champion ym em ye ko wow pynrem ya ka Laskein SCSC ha ka Group E ka 5th Meghalaya State League ha ka yalehke wa da pynman ha Amlarem ynne heiwa ka yalehke da kut ko da 2-2.
Chiteiñ na kiwa yalehke ka Mawlai toh kiwa da lai cha Manipur yow chimbynta ha ka I-League 3 heiwa da mihkhmat ki ya ka Meghalaya, kamtæ kiwa yalehke ynne ha ka MSL toh ki Junior Player heiwa da chah thap nyngkong ki ha ka Laskein lyngba u Bundaki Lamare (9′) tangwa u Jestibor Mawlong (32′) da su kylliang u ya ka Mawlai wei da ban sa u Syndongmiki Lyngdoh (55′). Ka Laskein da ye ko wow pynryngkat biang deiwa thap ha ka minit wa 60 lyngba u Rithrangmiki Biam.
Ha kiwi won ki yalehke, ka Langsning FC da jop ko da 8-0 ya ka Umlakro SC wei ka Nongkseh SSCC leh da jop ko da kat jooh ya ka Mawshun SC.
Ya ka Langsning da thap da u Nelson Rymbai (32′, 62′, 88′, 90’+1) wei da man u kam u Top Scorer kattæ deiwa yoh u thap 11 sien. U Mebanlamlynti Masharing (29′), u Samuel Phawa (56′) wa u Morningstar Khongkiang (79′) toh kiwi de kiwa da yoh u thap wei da em leh kawi kawa da thap bakla ha ka minit wa 73 da uwa yalehke ka Umlakro ha kani ka yalehke ka Group F.
Ha SSA Stadium, Shillong, ya ka Nongkseh da thap da u Chesterpaul Lyngdoh (16′, 35′, 88’P) uwa da yoh Hat-Trick ha ka yalehke ka Group A. Kiwi de kiwa thap toh u Hardy Cliff Nongbri (11′, 90’+2), u Shano Tariang (52′, 90′) wa u Fullmoon Mukhim (90’+4).
Ha Wahiajer wa pynman ya ki yalehke ka Group E, ka Lumphyrnai Sohphoh FC da jop ko ya ka Lamyrsiang SCC da 6-1. Kiwa thap kool ya ka Sohphoh toh u Rio Marboh (9′, 45’+3, 72′, 79′), u Phrangsngi Law (81′) wa u Chandame Suna (90’+3) katwa u Seiborki Kharlukhi (34′) da thap u ya ka Lamyrsiang.
Ha kiwi won ki yaleheke wa pynman ha madan ka MFA ha Shillong kiwa man ki yalehke ka Group B, ka Mawphu SC da pynrem ko ya ka Mulang SC Nangbah da 3-2. U Woldrik Susngi (10′) da yoh u wow thap nyngkong ya ka Mulang tangwa ka Mawphu da su kylliang ko le tylli lyngba u Arkidon L War (28′), u Larikupar Nongkynrih (64’P) wa u Banman Roy Nongsiej (83′). U Dashwakini Susngi (90′) da thap u ya ka kool wa ar ka Mulang. Ka Mulang kattu da rem ko la soo sien.
Ha Khliehriat wa pynman ya ki yalehke ka D, ka Rymbai Shkenshynriah SC da jop ko ya ka Ladthadlaboh SC da 2-1 hadien wa chah thap chwa. U Pyniaidskhem Sylliang (31′) da thap u ya ka Ladthadlaboh tangwa ka Shkenshynriah da yoh ko ar kool na u Hesmiki Rymbai (67’P, 90’+2).
Ha Williamnagar, ka Maram FC da jop ko ya ka A’chik SCO Rongjeng da 3-2 ha ka Group G.
Ha ka Group H wa pynman ha Mawkyrwat, ka yalehke da kut ko da 1-1 hapyrdi ka Seng Samla Umdang Pyllun wa ka Mawten SC.
Mynstep daw em kawi donhi ka yalehke, katæ ha ka Group G hapyrdi ka Attong Matgrik FC wa ka Janepih YSCA heipor 3:00 waje i sngi ha Williamnagar.
Discussion about this post