Waroh san tylli ki Team heh ka Shillong kitæ ka Mawlai SC, ka Shillong Lajong FC, ka Nongkseh SSCC, ka Nangkiew Irat SC wa ka Rangdajied United FC da jop ki ya ki yalehke yong ki ha ka 5th Meghalaya State League Round of 16 ynne wei kiwi de kiwa jop toh ka Maram FC na West Garo Hills wa ka Rymbai Shkenshynriah na East Jaintia Hills yow yoh u lai chakhmat yow psiah Quarter Final.
Ka yalehke wa pynman ha Mairang hapyrdi ka Langsning FC wa Lumphyrnai Sohphoh FC ym em yoh u pynman ka neidaw wa joor slap wei daw rah ka cha SSA Stadium Shillong mynstep heipor 6:45pm.
Ha SSA Stadium ynne, ka Nangkiew Irat da jop ko da 2-1 ya ka Khimusniang SC.
Ka Nangkiew da thap ko lyngba u Neblejohn Lyngkhoi ha ka minit wa 31 wei da thap biang ko sa kawi chwa u kut ka kylla miet. U Defender ka Khimusniang, u Luckyness Khyriem da yoh syndon u da ka Direct Red Card deiwa leh u ya u Dibinroy Nongspung. Da ini da yoh ya ka Free-Kick kawa tne nyngkong ya u dieñ kool tangwa dapoi ko ha uwa yalehke ka Nangkiew uwa tipkam u Nikelson Bina (44′) uwa da yoh u thap suk.
Ka Khimusniang won da yoh ko ya ka Penalty tangwa uwa yang kool ka Nangkiew Irat, u Emerald Dan da ye u wow ngiat ya ka bol cha rood heiwa u Dawanbiangmi Passah (63′) da chim kabu u wow thap ya kani ka bol. Da em leh kiwi ki laad wa da yoh ka Khimusniang tangwa ym em ye ko wow pynkhih ya ka jaar iwa mut da kut noh i lai luti ko ha ka MSL 5.
Ha Amlarem, ka Mawlai da jop ko da 11-0 ya ka Thangskai Tiger SC kiwa thap da u Robertson Khongriah (13′, 18′, 32′), u Wadshwa Latoo (56′, 81′), u Jestibor Mawlong (83′, 88′), u Samlang Rympei (28′), u Fairming Suting (45’+1), u Kevin Rymbai (57′) wa u Basuklang Bina (59′). Kiwa yalehke ka Mawlai toh kiwa emlut ynne hadien wa liwan ki na ka I-League 3 ha Manipur.
Ka Shkenshynriah SC won da yachem ko wa ka Amlarem SC ha Khliehriat heiwa ka Shkenshynriah da jop ko da 2-0 da ki kool wa thap u Hesmiki Rymbai (7′, 26′).
Ka Janepih YSCA da rem ko ha ka Rangdajied ha ka yalehke wa pynman ha Williamnagar da 3-1. U Mebannangkiew Thabah (30′) da thap nyngkong u ya ka RUFC tangwa u Edyson Iawphniaw da su kylliang u ka minit wa 90. Kamtæ dapoi cha ka Extra Time heiwa ka Rangdajied da thap ko lyngba u Ricky Mawlong (98′) wa u Elnathan D Wahlang (107′).
Ka Shillong Lajong FC won da jop ko ya ka Mishon SSCC da 5-0 ha Wahiajer da ki kool wa thap u Fridison Wanniang (57′, 81′, 86′) wa u Deibormame Tongper (45’+2) deilang kawi ka Own Goal ha ka minit wa 75.
Ha Mawkyrwat, ka Maram FC da jop ko ya ka Seng Samla Umdang Pyllun da 1-0 da ka kool wa thap u Tremarchwal Ch Marak ha ka minit wa 68.
Ka yalehke wa khaddooh ynne toh hapyrdi ka Nongkseh SSCC wa ka Mawphu SC heiwa ka Nongkseh da jop ko da 5-0 da ki kool wa thap u Hardy Cliff Nongbri (36′, 66′), u Shano Tariang (45’+8) wa u Chesterpaul Lyngdoh (64′).
Discussion about this post