Jowai: Ka Lumniwar dang pynim ko yei laad yong ka wow psiah cha ka Semi Final ka Meghalaya State League (MSL) 2019 naka Group-A deiwa jop ko ynne yaka Lawbah da 8-0 yow yoh ko u chong chwa kattæ ha khlieh ka Group-A deiwa chim yei thaw ka Shillong Lajong ynne ha Jowai.
Da ini i jop ka Lumniwar kattu da em ko yaka Goal Difference wa +21 katwa ka Lajong em ko +18, wei waroh ar em ki mar 10 Point. Ka yalehke hapyrdi kini ki ar liang haka sngi nyngkong kani ka tayaw da kut ko khlem em wa yoh u thap kool. Kamtæ ka rai wow psiah Semi Final kattu u rai ha ki yalehke wa khadooh kani ka Group.
Ka Lumniwar da emkaam ko da i jop wa boon kool yow pyntam yaka Goal Difference ka Lajong, wei da yoh ko yeitæ ynne ka sngi deiwa sdang ko u thap kool haka minit wa 16 lyngba u Daminot Nongphlang. U Man-of-the-match u Andyson Lapang da yoh u yaka Hat-trick haka kylla step (26′, 38′, 41′) yow pyntam yaka Lumniwar da 4-0 hadooh wa kut ka kylla step.
Ka Lumniwar da thap ko sa soo kool haka kylla miet lyngba u Shemjingmut Kharmyndai (58′, 68′) katwa u Lapang (62′) wa u Kitdorlang L Nonglait (87′) da yoh ki mar chi kool.
Haka yalehke wa ar, ka Umkaber da jop ko yaka sien wa nyngkong deiwa pynrem yaka Umrit 2-1. U Pynkupbor Kharbteng da thap u yaka kool nyngkong yaka Umkaber haka minit wa 63, tangwa ka Umrit da su kylliang ko da ka kool u Banphira Kurbah (76′). U Precious Jala won da pynjop u yaka Umbaker haka minit wa 84 yow pynkut ya ka lai luti ka Umkaber haka MSL dei jop ha uni u snem.
Ka Royal FC, Umrit waka Umkaber waroh da yoh ki mar le point. Deiwa kheiñ yaka jop Head-to-head da neh kat jooh neidaw waka Royal da dep jop ko yaka Umkaber katwa ka Umrit da jop ko yaka Royal, kamtæ deiwa kheiñ yaka Goal Difference ka Royal da yoh wa soo ko, wa san ka Umrit waka Umkaber heiwa ynru.
Ki yalehke haka 9 tarik kiwa man leh ki yalehke khadooh ki Group, man ki kamni ha wah:
Group A (Jowai) – Shillong Lajong vs Umrit (10:30am); Royal FC vs Lumniwar (1:30pm)
Group D (Resubelpara) – Garo Warriors vs Salaram (1:00pm)
Man of the Match: Andyson Lapang (Lumniwar) 
Umkaber 
Man of the Match: Precious Jala (Umkaber) 
Discussion about this post