Ka Mawlai da soom ko chakhmat deiwa jop da 8-0 ha ka yalehke Quarter Final ka Meghalaya State League 2024 pyrchah ya ka Khliehmawlieh ha SSA Stadium, Shillong yow booh yei thaw yong ki ha ka Semi Final.
Ha kawi won ka Quarter Final, ka Ladthadlaboh da jop ko ya ka Sutnga da 5-2 ha ka yalehke wa pynman ha Diengshynrum, Khliehriat.
Ka Shillong Lajong toh kawa da yoh u psiah Semi nyngkong deiwa jop ya ka Rangdajied United da 3-1 ha ka tayaaw wa dep.
Ka Sutnga waka Ladthadlaboh ym pu yachem ki ha kani ka Tournament heiwa ka Sutnga da yoh ko wow thap nyngkong ha ka minit wa 13 lyngba u Raplangki Lyngdoh tangwa 10 minit chwa wow kut ka kylla step, ka Ladthadlaboh da ye ko wow su kylliang da ka kool wa thap u Rangdajied Sayoo (36′).
Ha ka kylla miet, ka Ladthadlaboh da pynyoo ko yei bor deiwa thap u Dangaitlang Mulieh (51′), u Rangdajied (68′) sa chisien, u Banteilang Shylla (70′) wa u Dowell John Shylla (89′). Hapyrdi ini waroh, ka Sutnga da yoh ko sa chi kool wa thap da u Solmon Sympli (77′) tangwa ym ye de wow su kyliang ya kiwa dang sah.
Ka Mawlai won da thap ko ar kool ha ka kylla step kawa yoh nyngkong ko haka minit wa 26 wa thap bakla uwa yalehke ka Khliehmawlieh wei da pynbood won sa u Khrawkupar Jana ha ka minit wa 35. U Robert Khongriah (53′, 55′), u Romarius Laban (64′, 83′), u Khrawkupar (87′) sa chisien wa u Kevin Rymbai (90’+1) da pyntikna ki wa ka Mawlai ym em ieh jem ko tang kajiak leh ha kani ka yalehke Quarter Final.
Ka Quarter Final wa khaddooh u pynman hapyrdi ka Chipakkore waka Rymbai Shkenshynriah ha PA Sangma Stadium, Tura ha kani ka 14 tarik heipor 1:00 waje i sngi.
Discussion about this post