theme-sticky-logo-alt
theme-logo-alt
Advertisement ad1

Mynjur ka Assam ya ka aiñ yada masi, yow wanrah yei suk i saaiñ, ong u Sarma

Advertisement ad1
Advertisement ad1

Ka Assam Assembly ynnin ka sngi da mynjur ko wow pynman aiñ ya ka Assam Cattle Preservation Bill, 2021 kawa booh kyndon heiyatoh wa i choh doh masi, i chalan ya ki masi wa i baam doh masi hanla ka liang pyrchah da mih ki cha lait kam ka dak pyrchah wym bien ka sorkar wow phah chwa ya yani ka Bill cha ka Select Committee.

Ki dkhot ka BJP wa em ha ka liang synchaar da kbai ki “Bharat Mara ki Jai” wa “Jai Shree Ram” deiwa thaap ya ki miej mar ya pynbna u Speaker, u Biswajit Daimary wa da mynjur ya kani ka Assam Cattle Preservation Bill, 2021.

Advertisement ad1

Ka liang pyrchah wa kynthup ya ka Congress, AIUDF waka CPI (M) da kyntu ki ya ka sorkar wow phah ya kani ka Bill cha ka Assembly Select Committee yow puræ bniah ya kani ka aiñ heiwa u Montri Rangbah ka Assam u Himanta Biswa Sarma da kyntait u wow leh ya ini.

Hawa e yei klam hapoh ka Dorbar da ong uwa i thmu kani ka aiñ ym toh wow khang ya kiwon kiwon wow baam doh masi ki tangwa kiwa baam doh masi toh u burom ki yei sñiaw yong niam yong kiwi, da ong u leh wa ym toh du ki Hindu wow em yei bahkhlieh wow wanrah yei suk i saaiñ ha ka imlang sahlang, ki Muslim leh toh u leh ki yei jooh.

Hawa boh ya ki kyndon ka Bill wa khang wow choh doh masi hapoh 5 Km na ki thaw wa em ki Temple, da ong u Sarma wa da em boon boon Kilometre ki thaw wym em ki Temple wei da em 70,000-80,000 tylli ki thaw hapoh ka jylla ki wym em Hindu. Tangwa da pdiang u wow pyndooh ya i ktien “Buffaloes” katkam wa da wanrah u MLA ka AIUDF u Aminul Islam.

U Sarma hawa wanrah ya kani ka Bill da ong u wa kani toh yow pyntikna wym em i pynyap wei choh doh masi ha ki thaw wa boon da ki Hindu, Jain wa ki Sikh kamjooh kiwi ki thaw wa em ki bru ki wym em baam doh masi.

Katkam kani ka Bill, ki Veterinary Officer u e Certificate ki kiyi ki jait masi wei lada toh kiwa da em 14 snem chaneiñ, wei u ye u pynyap du hadien wa yoh bor lada man ki ki wym ye de wow im lane kiwa da yoh kjut.

Kani ka Bill leh da booh kyndon ko yei kit ya ki masi hapoh ka jylla kamjooh cha baar jylla deiwa biang ki kot ki sla, ym em khang yei kit ya ki masi hawa pynemkaam ha i rep i riang, ym emkaam wow yoh bor lada kit ya ki masi cha ki yaw kiwa da tipmit yow ya dai ya thied hapoh ka District.

Ya kiwa leh pyrchah daw chah kset patok ki ym duna ya 3 snem wa ka kuna wa T.3 lak hadooh T.5 lak. Lada em kiwa leh pyrchah arsien ya i jooh, i pynchitom ya ki leh man ko ar chah.

Share this:
Previous

Da ka President’s Police Medal yoh u SP warim ka Jaiñtia Hills

Next

Pynlait ka Meghalaya Police ya i sur wow lehwarom yei dap 75 snem i laitlooid ka ri