Ka JSU ynne da yachem ko wa u Director ka Directorate of Health Services (M) ka sorkar Meghalaya yow yaklam yei yabhah ya ka State Quota na ka Central Pool ya kiwa lai puræ MBBS cha baar jylla kawa dang dep pynbna ha kini ki sngi wa dep.
Neiliang ka seiñ da kdaw ko wa da em kawa psiah hapoh ka Open Category da kawa yoh duna ka NEET Score wei kani toh ka Diya Ghosh kawa yoh ya ka NEET Score wa 472 katwa uwa yoh nyngkong ha ka Khasi & Jaintia Category u Rikor Nongkynrih da yoh u ya ka NEET Score wa 475 iwa da tam ya ka Diya da 3 Marks kawa da em ha ka Serial No. 13 ka Open Category.
Da kdaw leh wa ha ka Serial No. 14 da em ka Tanuska Chakravorty kawa yoh ya ka NEET Score wa 442 heiwa ya kani da tam wot da kawa yoh 7th Rank ha ka Khasi & Jaintia Category ka Suwandaka Wann kawa da yoh ya ka NEET Score wa 443.
Ka JSU da ong ko wa uwa yoh nyngkong na ka Khasi & Janitia Category da tam u ya kawa yoh 13 ha ka Open Category katwa kawa yoh 14 da chah tam ko da kiwa yoh wa ar hadooh ynñiaw na ka Khasi & Jaintia Category.
Chooh chooh ka seiñ da ong ko leh katkam ka hukum ka Supreme Court da ong wa ki Unreserved Seat toh u man ki ya waroh deiwa jied ya kiwa lehbha.
Kamtæ ka seiñ da dawa ko wow rah ya ki Khasi & Jaintia Candidate kiwa em ha ka Top 8 kitæ u Rikor Nongkynrih (475), Niki Arrisa Shylla (468), Rapmi Toi (467), Bryan Lionel Nongsiej (463), Phibankyntiew Kharkongor (449), Amebaaihunsha Kharbhih (445), Suwandaka Wann (443), Eleazer Vincent Lyngdoh (442) kiwa da em hok wow psiah hapoh ka Open Category.
Kiwi de ki dawa toh wa ki College wa da yabhah kiwa da e kattæ ymtoh de wow pynkhih ki.
Neiliang ka chnat i chait i khiah da ong ko wa daw bichaar ko yeini i dawa wei da pynsangeh leh yei soi ya ka Bond kamjooh ini i pynbna pyrtuid toh iwa da ksoh chwa kattæ kat wym pu pynbna da kamni tangwa ini ym ktah ko ya kiwa lai puræ MBBS ha Shillong Medical College.
Discussion about this post