U DC ka East Jaiñtia Hills District da khut yalang u ynne ka sngi heiwa da emlang ki ar ngut ki MLA ka District, u Kyrmen Shylla wa ka Santa Mary Shylla deilang ki MDC, ki Principal ki skur, ki bru wa chemphang ha ka aiñ wa kiwi de yow yaklam heiyatoh wa ki kaam thung kreh wei khut yaleh kreh da ka District Selection Committee (DSC).
Yeini da leh hadien wa da yoh ya ka chithi na u Reachingson Siangshai wa u Kerlang Ksoo kiwa da kdaw ya kiwa boon iwa duna ha ka DSC nadooh wow pynbna ya ki Cut-Off Marks, ki Interview Ratio wa kiwi de yow man i yaleh kreh iwa khooid.
Hawa yaklam, da chim ya ka rai wow pynbna ya ka Qualifying næ Cut-Off Marks mar ya dep pynmih ya ka Final Result. Da pyntikna leh wa manda khut yaleh Personal Interview u man ko 1:2 ka Interview Ratio.
Yow lait u em kiwa yaleh kreh ki wym tip chaphang ki tarik wa emkaam, daw phah da ka E-mail wa SMS cha ki.
Wei yow man leh ka yalehkreh kawa em i kitkhlieh, waroh ki Provisional Answer Keys wa ki Final Answer Keys daw booh ki ha ka Website ka DSC hadien wa pynman ya ka Exam.
Chooh chooh da chim leh ka rai wow thooh laad ka DSC kammon u pyndam ya ka Internet chipor deiwa pynemkaam da ki Jammers neitæ u booh CCTV heipor wa pynman Exam yow lait u em kiwa leh tooh.
Sa iwi i rai wa hadien wa pynman ya ka Exam, ki Marks yong waroh kiwa yalehke kreh daw pynyoo paidbah ki ha ka Website ka District.
Neiliang waroh kiwa chimbynta da pynsñiaw ki yei hun iwa da wanrah da ki bor District yow pynman yeini i kaam iwa khooid wa suba wei da e buit leh wow pynman chooh kam kani ka yachemlang yow booddien yei pynkrehkaam yeini wa da wanrah.
Puræ leh: 17 tylli ki buit e ki ar ngut cha u DC yow pynbha pynmiat yei krehkaam ka DSC, East Jaiñtia Hills
Discussion about this post