Ynne i janmiet da em ka yaklam wa jrong ar kynta tam hawa yachem u Principal Secretary, ka chnat Labour ka jylla, u GHP Raju wa ka Angela Rangad kawa mihkhmat ya kiwa khih mylla nadooh kiwa krehkaam yung, kiwa chongdai madan, kiwa kamai kari wa kiwi de kiwa wan na ki kattu katni ki dong ka Shillong hajrong i wym biang i rukom su ya ka poisa yarap ka sorkar hapoh ka CRAWL wa ka BOCW neibynta u snem 2020.
Ha ini i yaklam, neiliang ka Angela da kylli wei da paan ko yei pynche deiwa dawa leh wow pait biang sa chisien yei rukom su poisa ya kiwa ka sorkar da kam ko wa da yoh lut ki ya ka T. 2100.
Da kylli leh wa lada ka sorkar da yoh ko ya ka Report na ki Bank nadooh ynnin u snem yei rukom phah poisa heiwa da pynsñiaw ki yei sñiawkhia boi wym biang i rukom phah poisa cha ki Bank kiwa neiliang yong ki won ym em leh ki yeiwa emkaam boi leh wa da neh hi-eh kani ka poisa hapoh ki Bank.
Da dawa leh na ka sorkar wow pait ki leh neiyi i daw wa kitu kiwa chah kyntait da chah kyntait ki wei wow pyntip cha ki yei daw wa chah kyntait ki.
Neiliang ka sorkar da kular ko ya kitu kiwa yoh dang du chibhah donhi wa daw phah ya ki Bank wow pynbait ya ini katwa ya ki 32,000 ngut kiwa toh u yoh myntoi kiwa ym pu em yoh yei yarap hadooh katni, ka sorkar da kular ko wow lai dei bru yow pyntikna ya ini chisyndon ha waroh ki District wei daw e ya ka Report man ka tayaw wa lada da dep phah næ ym em ya ka poisa.
Heiyatoh wa ka poisa wa toh u yoh ki BOCW kawa T. 5000, da ban joor wa ya kani leh ym em biang i rukom su ya ki wei hap wow pynbait ya iwa duna.
Kamtæ da e por hadooh ka 15 tarik u Naisaphra, 2021 yow pyndep ya ini waroh heiwa da pyndam chwa yei yakhih.
Ynne ka sngi kawa man leh ka tayaw wa ar wa yakhih ka Angela Rangad, da em kiwa wan wow pynyoo yei kyrchaan ya ka hakhmat i thaw psiah chapoh ka Secretariat.
