Jowai: Ka Citizenship (Amendment) Bill ynne i step do yoh ko yei mynjur naka Union Cabinet yow phah yaka cha ka Parliament kawa da yooluti wa daw wanrah haka miej yow yaklam yaka hapoh ka Lok Sabha ha kani ka tayaw wow wan.
Ka Union Cabinet da mynjur ko ya kani ka Bill hadien wa da dep yachem u Home Minister u Amit Shah ya ki seiñ naka thaaiñ North East ini wa dep.
Kani ka Bill toh ka wow tipmit yaki baar ri kiwa ym toh ki Muslim kiwa phetwiar kam naka ri Pakistan, Bangladesh wa Afghanistan kamjooh kiwa chah lehbeiñ chah pynchitom wa man ki kam ki Hindu, Sikhs, Christian, Jains, Buddhist wa ki Parsi yow man noh ki kam ki tre ri ka India.
Ynnin u snem ka liang pyrchah haka dorbar tlang da warah ki ya kiwa boon ki daw wym man u pynman aiñ ya kani ka Bill wei ha uni u snem leh ye wow jia i jooh wei daw dawa ki wow phah ya kani ka Bill cha ka Select Committee chwa wow phah ka cha ka Rajya Sabha.
Ya kani ka Bill daw wanrah da u Amit Shah hapoh ka Parliament, wei ka BJP da phah ko ya waroh ki MP (Lok Sabha wa Rajya Sabha) wow em ki manda wanrah ya kani ka Bill khlem dam.
Neiliang u montri yada ri u Rajnath Singh da ong u wa ki le tylli ki jan ri waka India toh ki ri Muslim kamtæ kiwa ym toh ki Muslim maad ki yei chah pynchitom neidaw ka niam.
Neiliang kiwa boon ki seiñ napoh ka thaaiñ North East hanlada kular u Amit Shah yaki wa ym pynkrehkaam ya kani ka aiñ ha ki jylla wa em ILP waka Sixth Schedule, yieñ pyrchah ki ya kani ka Bill.
U MP ka Congress u Shashi Tharoor da ong u wa hei sñiaw yong oo samen wa pyrchah u ya kani ka Bill deiwa ong wa man ko pyrchah yaka yurim ka synchaar paidbah deiwa pynyaphær ya ki bru deiwa kheiñ yaka niam.
Heijooh i por ka BJP da kular ko leh wow pynkrehkaam yaka NRC ha waroh ka ri yow beh yaki baar ri.
Discussion about this post