I kajia pood hapyrdi ka Assam waka Mizoram da sdang joor i heiwa katkam wa pyntip u DC ka Kolasib District, Mizoram u Dr. H. Lalthlangliana wa ha i janmiet ka 17 tarik ha iwa jia ha Vairengte wa Lailapur ha khappood, da em 7 ngut ki bru paidbah ka Mizoram kiwa da mynsoo wei 1 na ki da chah sumaar u ha Kolasib District Hospital wei da man u uwa da lait nei maa kattæ chooh. Da pyntip u wa ini da jia hadien wa chah dat ki pulit ka Mizoram IR ha ki bru wa sah ha Lailapur.
U Deputy Commissioner ka Kolasib da pyntip u wa ki pulit deilang wa ki Magistrate da em ki cha kani ka thaw wei ki paidbah toh u e laad ki ya ki wow leh ki yei kaam yong ki kamjooh wow dam u pynman yaki yalang paidbah ha kani ka thaaiñ.
U DC da ong u leh wa da em boon ki khubor wa yahbkla kiwa da pynpoor ha ki Social Media wei daw pynchitom ya kiwa leh ya ini.
Neiliang ka Mizoram da ong ko wa ha ini jia da poi cha i mynsoo hadien wa ki bru na ka chnong Lailapur wa em ha Cachar District ka Assam da kawang moo ki ki pulit ka Mizoram kiwa da booh ha khappood heiwa ki paidbah wa neiliang ka Mizoram da lai kdong ki ya kini ki bru. Kini ki bynta toh kiwa ym em u pood wa kdaw che heiwa ha ki snem wa da dep da ya pynbait wow ieh chwa kamwa man wei ym toh wow kyntoor pood wei ki thaw khappood ym pu toh u em ki kiwa kamtre.
Neiliang won u SP ka Cachar, Assam da ong u wa em uwi uwa na Assam uwa da mynsoo ha ini i jia tangwa da em boon ki khubor thok ha ki Social Media kiwa da pynheh ya ini iwa jia wei kattæ da man iwa jai jai.
Haka yalang Cabinet Meeting wa pynman jhan ka sorkar Mizoram ynne ka sngi, neiliang ka Home Department ka Mizoram da pynsñiaw ko yei sñiawsih hajrong ini wa jia ha ki thaw khappood iwa da ktah yei chongsuk chongsaiñ ki le tylli ki thaw ha Thinghlun, Saihapui ‘V’ wa Vairengte wa em ha Mizoram deiwa pynbaad yaki bor District ka Cachar wa Karimganj wei heijooh i por leh da yooluti yaka sorkar Assam wow wanrah biang ko yei chongsuk. Wei neiliang ka Mizoram leh daw phah chooh chooh ko yaki pulit cha kini i thaw yow lait wow jia chooh iwon iwon i awri awra.
Chooh chooh ka Mizoram da ong ko wa neidaw wa pynman ya i khang sarok (Road Blockade) da ka Assam ha ki sarok-bah ha ki thaw psiah na kawi ka jylla cha kawi kiwa pynyabi yaka Assam waka Mizoram, kiwa boon ki mar emkaam ym yoh de ki wow psiah wei dang yaleh yow pynpoi yaki LPG, i phniang kari wa kiwi kiwi na kiwi tawon ki jylla. Kamtæ da kyntu leh yaki paidbah wow man ki kiwa yaichah wei ym toh wow tieñsar deiwa sdang wow thied yaki mar palat ya iwa emkaam.
Da ong leh wa i yaklam waka sorkar Assam dang lai i yow pynbait ya u pood wei da pyntip leh cha ka Ministry of Home Affairs ya ini i leh embor ka Assam heiwa u Union Home Secretary da khut u yaka yachem lang wa u Chief Secretary ka Assam wa Mizoram lynba ka Video Conference mynstep ka 19 tarik heipor 11 waje i step.
Ka sorkar Mizoram da kyntu ko leh ya ki paidbah wym toh u chim kabu ya ini iwa jia yow myntoi samen lane yong ki wi ar.
Puræ leh: Mih biang i kajia pood ka Mizoram-Assam hadien wa tympra ki sahep sorkar ka Karimganj ya iwi i trep
