Jowai: Ka yakhun Semi Final wa ar yong ka 4th Invitation Knock Out Football Tournament ha Wahiajer da pynman ya ka Semi Final ynnin ka sngi ha Madan Wahiajer, WJH hapyrdi ka Lewa FC wa ka Lumbahdakha SC.
Ha kani ka yakhun da jop ka Lewa FC da 2-1 heiwa ya ki kool ka Lewa FC da thap da u Kitboklang Pale wa u Donald Diengdoh katwa ka Lumbahdakha SC da thap ko chi kool lyngba u Shai Nongrum.
Ha ka yakhun ynne ka sngi yei naam Man of the Match da yoh da u Kitboklang Pale na ka Lewa FC.
Ka yakhun Final yong kani ka lympung daw pynman hapyrdi ka MLP wa ka Lewa FC mynstep ka sngi heipor 2:00 waje heiwa ki wa jop u yoh ki T. 2 lak katwa kiwa rem u yoh ki T.1 lak.
Discussion about this post