I booh ya ki 8 tylli ki Speed Breaker wa thymme nadooh na Lad Iawthymme hadooh ha Mihmyntdu da wanrah ko yei ood na ki paidbah wa lai wa wan kamjooh kiwa kamai kari neidaw wa da wanrah ko yei sahkut kari kawa da sdang nadooh na Madan Dai Masi ter ter hadooh Mihmyntdu waroh chi sngi.
Kini ki Speed Breaker wa em ha Lad Iawthymme, Lad North Liberty School, Lad Jowai Public School, Lad Tommy Memorial School, Lad Kiang Nangbah Govt. College, hakhmat ka yung krehkaam ka chnat Forest, hajan ka yung krehkaam ka District Commerce & Industries Centre wa hajan ka Madan Wahriong, Mihmyntdu toh kiwa pyndait nyngkong na Mihmyntdu wei ha Jowai won ha kani ka tayaw wa dep.
Neiliang ka seiñ kiwa kamai Taxi da dep ki wow lai ujor cha u ADC ka West Jaiñtia Hills District wa kamjooh cha u Traffic In-Charge Jowai hajrong ini neidaw wa thut ka kamai ki heiwa naka 15-18 Trip chi sngi wa lai ki na Iawmusiang cha Ladthadlaboh-Mihmyntdu da hiar cha 8 Trip wei da ktah ko leh ya ki khynnah skur neibhah da hap ki wow mih dang 7:00 waje i step heithaw 8:00 waje yow poi skur heipor wei manda wai skur leh hap yang Taxi deiwa rap slem neidaw ki Taxi boon ym bien de ki wow lai chadooh cha Mihmyntdu heiwa kiwa boon toh kiwa dong noh cha Iawmusiang na Ladthadlaboh.
Kini ki Speed Breaker toh kiwa da booh kam chibynta i chngaaiñ ki khynnah skur tangwa chwa wow em kini ki Speed Breaker leh ki kari ym toh ki wym yoh u pynhær kari ha kini ki bynta heiwa ka lai ka wan da man chwa ko kawa suki tangwa katni da man ko kawa suki chooh chooh.
Iwa chem chitom wa em kini ki Speed Breaker toh hap wow lai suki bha hapoh 8 Km/h neibhah lada lai rap smat daw ktah ko ya ka kari.
Hawa pyrchang u Wyrta ynne ka sngi kawa man leh ka sngi chuti da chimpor awjan chi kynta nadooh na Iawmusiang cha Mihmyntdu wei wow poi biang cha Iawmusiang. Iwa sahkut wa chem toh iwa joor bha manda lai cha Jowai na Mihmyntdu.
Neiliang ki bor District da pyntip ki wa kini ki Speed Breaker man ki kam chibynta wow sdang kreh neibynta ka Smart Town.
