Uwi u manpa na ka chnong Moopala East Jaiñtia Hills District uwa pyrtuid Self Denial Lyngdoh da man uwi wa da chim ya ka laad ka luti wow pynkylla dur yei thaw wa jooh kreh mooyong u cha i thaw rep soh khontara wa yoosuk bha kawa em leh ki nan, ki yingkieñ lai kjat, kamjooh ki jait dieñ waphær waphær wa da thung lang ha soodong kani ka thaw.
Kani ka thaw yong oo em ko ha chnong Moopala hi kawa heh kamwa 35 Hectare tam, wei nachwa ha kani ka thaw ki krem mooyong em ki hadooh kamwa 16 tylli, tangwa hadien i khang tih mooyong da ka NGT ha u snem 2014, nadooh u snem 2015 da sdang pynkylla dur noh u ya kani ka thaw cha ki thaw rep soh khontara, wei hei lailuti yong oo chirup i yarap ka chnat Horticulture, ka chnat Water Resources, East Jaiñtia Hills District wa ki 12 ngut ki warep wa yakrehlang hapoh ka S.D. Lyngdoh & Society Khasi Mandarin Farm, kamwa man kattæ da em hadooh 20,000 tylli tre soh wa da thung.
Kamtæ yow sñiawthooh chooh chooh hajrong i jop kani ka kaam. Ha ka 6 tarik uni u bnai lyngba ka Press Tour wa da pynkhreh da ka chnat Directorate of Information & Public Relations, Meghalaya. Da yah ko ya kiwa thoh khubor cha kani ka thaw wei da yohlaad u yaklam wa u tre kani ka thaw kamjooh ki sahep ka chnat Water Resource wa kynthup ya u K. Lamare, Executive Engineer, u R. Tongper, Junior Engineer, neitæ u sahep ka chnat Horticulture, u D.B. Dhar, District Horticulture Officer, Khliehriat.
Hei yaklam wa u Self Denial Lyngdoh kam u tre thaw, da khana u wa nadooh u snem 2003 da kreh mooyong u ha kani ka thaw, tangwa da sangeh noh u ha u snem 2014 neidaw wa khang ka NGT. Kamtæ ha u 2015 da sdang pynkylla noh u chei thaw rep deiwa thung chwa kajiak ki tre soh. Neitæ manda yoo u wa im wa heh ki, khut lok won u wow sdang noh da ka seiñ wei da e bynta thaw rep haroh u ya ki ha kani ka thaw yong oo neibhah du samen ym sñiaw ye u.
Khana haroh u wa heipor wa lai u kam u warep cha ka chnat Horticulture wow paan yarap ki symbe soh wa kiwi, heitæ poi i yaklam wa em ka Scheme sorkar wa ye u yoh yarap kamtæ neiliang ka chnat da lai li pait ko yei thaw yong oo wei chem ko wa biang nadooh i heh, i biang um leh, kamtæ ka chnat Horticulture da yarap poisa ko wei da pynkreh won da ka chnat Water Resources.
U R. Tongper, Junior Engineer Water Resources khana u wa ya kani ka Project wa da pynkreh ha kani ka thaw da tip kam ka Madan Mookhlot Minor Irrigation Project wa haap hapoh ka Pradhan Mantri Krishi Sanchaye Yojna, Per Drop More Crop PMKSY- PDMC wei da pynkreh ha ka mang poisa wa Rs. 42,45,300 yong u snem 2019-2020 wei da pyndep won ha u snem 2022-2023.
Ki jait pynkhreh kynthup ka nan, ka yingkieñ lai kjat najrong ka nan, ki top pynlang um wa khian wa ki heh 9 tylli, ki Pipeline wa 1.14 km, ki Pump wow taan um napoh nan 2 tylli kawi ka Solar Pump 3hp wa ka Diesel Pump 5hp.
Neiliang u D.B. Dhar, District Horticulture Officer Khliehriat pyntip u wa ka yung krehkaam yong ki da e yarap haroh ko ki symbe soh, ki sboh, ki Drip Irrigation, i yada ya ki dieñ kam da u chuni, ki dawai khñiang, neitæ ka Nursery yow booh symbe wa kiwi deiwa yaleh u pynku yei rukom rep khang yow man nuksa ya kiwi khamtam cha kini ki thaiñ wa jooh kreh mooyong wa boon kiwa ong ymhoi rep de.
Heiyatoh waka yaaw ka haat, u Self Denial Lyngdoh da ong u wa ini wadep tang u soh ym pu ih leh da em ki bru wa wan paan thied, wei u soh wa da thung chwa leh da ye dai u kamwa 2 lak tam haroh.
Katwa kiwa dang khian won ong u dang hap yang yei por neibhah chimpor hadooh 8 snem tam haroh yow yoh u khait soh.
Heiyatoh wa kani ka kaam yong oo, booh u i kyntu ya kiwi leh wow mih ki chakhmat kamwa leh u neibhah chem u wa wot i thaw wa jooh tih mooyong wym em eh u rep u riang næ u pynyirngam ki.
Discussion about this post