Na kiwa chaniah bha kiwa kreh lait ka phlim Da Theh Lut 2

Jowai : U wa pynmih (Producer) ka phlim Da Theh Lut-2 u Ebormi Muksor da booh u ka ujor (FIR) ha ka Ummulong Beat House neidaw wa em ki bru wa dai tooh ya kani ka phlim ha chwa u yoh u pyllait paidbah ka wei kamjooh leh kani ka phlim toh ka wa dang yang Certificate ko na ka Central Board of Film Certification.

Yeini i yoh tooh ki paidbah toh da suba da jia i nadooh u bnai March wei ha i boodien ki Police da chem kse ki na ki bru wa em ya kani ka phlim ha ki mobile yong ki wei da yoh u kem leh hadooh 17 ngut kiwa phla wa yoh ki na uwi sa uwi won na uwi hadooh wa chem tre wa yoh ya ka phlim pyn na kiwa kreh wa chaniah bha u Ebormi.

Na kiwa em ya kani ka phlim ha ka phone ki da chem hadooh kiwa act ha kani ka phlim kiwa ym em pyntip cha ki tre kat u yoo ki leh sdang ki u saam lok ka.

Heini i takit ki Police da chem leh wa kani ka phlim da dai ya ka ha ki Cyber Cafe wa em ha Jowai, Ummulong wa ha Mukhla. Da ong kini tre Cyber wa dai ki ya kani ka nadooh T. 300 hadooh T. 500 iwa sñaiwphylla heiwa ya kani ka phlim da thmu u dai ya ka manda pyllait paidbah hei dor T. 250 donhi.

Ya kani ka Da Theh Lut 2 da dep pynyoo fete ya ka cha palat chnong wei ya ka Master Copy ym em lock ya ka yow lait ki bru u copy ka. Katkam i chem tre da ong wa kiwa kreh wa chaniah bha u Ebormi da e ki cha ki lok wa yajan wa ki tangwa kini ki lok yong ki won da copy ki ka wei sdang ki ka u saam bru.

Related posts

Jop uwa na Dulong ya ka Rs.1.50 lak ka Loomiongkjam

January 9, 2026

Daw wan tem biang ki Scorpions ha Shillong hadien 18 snem

January 8, 2026

Ki tre ka phlim da kyrpaad ki cha ki paidbah yow delete ya kani ka phlim na ki phone wa ki computer yong ki yow lait u chah daiñ kuna ya kiwa tooh (piracy) ya ka phlim iwa poi hadooh T. 2 lak.

Ya kiwa da chem kiwa tooh ya kani ka phlim ka aiñ dang lai ko cha khmat yow pynchitom ya ki.