Na Meghalaya yoh pynlait ki pulit ya uwa kamai kari ka Assam wa chah rahbor

Uwi uwa kamai kari uwa na Assam da yoh wow pynlait oo napoh Williamnagar, East Garo Hills hadien wa chah rahbor u na i chnong u wa tip kam i Bowali iwa dang haap hapoh ka Mankachar Police Station, South Salmara-Mankachar District, Assam hadien wa em kiwa khut ya oo yow chim wai yaka kari wei ini toh i thaw wa em ha khappood ka Assam-Meghalaya.

Ini toh iwa da jia haka 4 tarik uni u bnai hadien wa uni uwa yah kari wa tip kam u Mustafizur Rahman (22 snem) uwa man u khon u Majiel Haque da yoh Phone u na ki bru wym tipmit heipor kamwa 8:30 i miet yow chim wai ya ka kari u.

Kamtæ u Mustafizur Rahman da mih u na yung u da ka kari wa em Number AS-01FL-0877 wei da wiar u khlem liwan de heiwa da sdang suba wa da chah rahbor u.

Hadien ini, u pa uwa cha rahbor da yoh Phone u na ki bru wym tipmit kiwa da dawa poisa yow pynlait ya u khon u. Da Phone biang ki oo hadien kattu katni kynta da ka Phone u khon u heiwa da dawa poisa biang wei da maham ki wow pynyap ya u khon lada lai u cha ki pulit.

Neiliang ka bei uni uwa chah rahbor da lai ujor ko ha ki pulit ka Mankachar Police Station wei da sdang ki wow booddien ya ki Mobile Number wa Phone cha u pa uwa chah rahbor wei deiwa leh yeini da ye wow lai pynlait ya u Rahman na Williamnagar, East Garo Hills District ka jylla Meghalaya.

Heiyatoh wa ini, ki pulit da kem ki ya ar ngut kiwa emkti wow rahbor ya uni kiwa tip kam u Kelsonath Sangma uwa na Songsak, East Garo Hills wa u Mofidul Haque uwa na chnong Pipulbari Pt.II, South-Salmara Mankachar District, Assam.

Related posts

Na Tluh yoh ki pulit ka East Jaiñtia ya ka kari wa chah thooh na Mizoram kawa tyrwa dai ha Facebook

January 12, 2026

Yoh kem ki pulit ya uwa dai Drugs ha Soo Kilo

January 9, 2026

Ki pulit da pteiñ ki wow kreh pyrchah ya kini ki kaam rahbor kiwa da khlan bha u jia ha khappood ka Assam-Meghalaya.

Ya ka kari da chem na Dudhnoi, Goalpara District, Assam.