Ki pulit ka jylla Meghalaya ym em chong-ngiah ki wei da pteiñ ki wow pyndep yei kaam wei heipor 1:30 i step synyaaw ynne da lai rah ya ka Sonam Raghuvanshi cha ka Ganesh Das Hospital, Lawmali yow pait bniah yei chait i khiah ko hachwa wow lai rah ya ka ha Kasari.
Ki pulit ka Meghalaya da yoh por ki du 72 kynta iwa man du 3 sngi wow takit ya ka Sonam, wei na ini i daw ym kwah ki wow pynsepai yei por hanla da man dei step synyaaw leh hadien wa da wanrah ka ha Shillong Sadar Police Station wei da mih won yow lai yah leh Medical Check-Up ya ka.
I lai yah pait bniah yei chait i khiah ka Sonam ha Ganesh Das Hospital ye wow man neidaw wa da punkhon ko wei lada toh iwa sakhiat ini daw pynphylla chooh chooh ya kiwa bood bniah ya kani ka khubor wei ye leh u man iwa jubab yei daw wa da jia ini waroh.
Neiliang ki pulit ka Meghalaya khlem sangeh da pynman ki yei takit yow chem ya kiwa pynyap ya u Raja Raghuvanshi, wei hadien tip yeiwa sakhiat, da lai kem ya waroh kiwa emkti nadooh ka Sonam deilang wa soo ngut kiwi ki chynrang yow wanrah ki cha Shillong hadien wa da yoh bor na ka Kasari.
Discussion about this post