Jowai: Ka seiñ North East Dialogue Forum (NEDF) ynne ka sngi da thoh ko cha u montri rangbahdooh ka ri u Narendra Modi heiyatoh wa iwa jia ya ka Agnes Kharshiing wa ka lok ko ka Amita Sangma kiwa da chah dat ha ki bru wa da suba toh kiwa khayi mooyong tooh heiwa kini ki arngut da mynsoo joor ki.
Ka seiñ da ong ko wa da jia ini waroh du neidaw wa chondur ki ya kiwa kit mooyong tooh ha Shohshrieh wei i kit mooyong yong ki toh iwa pyrchah ya ka hukum ka NGT.
Kani ka seiñ da ong ko leh wa ini wa jia toh iwa da pyrkhat chwa neibhah ka yutip wa yoh ki da ong wa da tip wa em ka Agnes ha kani ka thaw wei da suba wa da em ki yahkhmat wa embor kiwa leh ya kani ka kaam neibhah ka Agnes chwa wow jia ini da yachem chwa ko wa ki heh sorkar ka EJH.
Da e nongmuna leh yeiwa jia ya u Poipynhun Majaw hapoh kani ka District uwa da chah tynyap wei hadooh katni ym em pynchitom ya uwon uwon leh kamjooh iwa jia ya ka Patricia Mukhim heiwa da em kiwa pakhot Petrol Bomb ha i yung wa sah ko ha Shillong.
Kamtæ ka seiñ da kyntu ko ya u Modi wow krehlang wa ki dkhot ka National Human Rights Commission (NHRC) wow li hiar ki cha EJH wa cha Shillong yow pynman ya ka takit wei wow pynman leh ya ka takit wa laitlooid namo ka Independent Inquiry yeiwa jia ya ka Agnes, ka Amita wa iwa jia ya u Poipynhun.
Ka seiñ da ong ko leh wa ka sorkar Meghalaya emkaam ko wow thooh bniah kiyi ki kini ki wa yah truck kiwa em ha kani ka thaw hawa jia ya ka Agnes wei wow yaklam leh wa u UN Special Raporteur uwa pait ya ki kaam pyrchah yei chah leh beiñ ki kynthai.
Ka NEDF toh kawa kreh leh wa kiwa boon ki NGO nadooh ki seiñ niam, ki seiñ kynthai hapoh ka thaaiñ mihsngi wei ini toh katkam wa pyntip u U. Nobokishore u Convenor wei ya kani ka chithi da phah cha u Rajanth Singh u montri ka kaam poh yung ka sorkar India.
Discussion about this post