Hadien soo sngi wa lai kynreh ya ka Farm House u Bernard Marak kawa tip kam ka Rimpu Bagan wa em ha Edenbari ha Tura, ki pulit da yoh ki wow kem ya u Bernard uwa man leh kam u Vice President ka BJP Meghalaya wa u MDC ka Tura na Uttar Pradesh ynne ka sngi.
Ya u Bernard da yoh wow kem da ki pulit na Hapur District ka Uttar Pradesh hadien wa pynman yei pynsageh kari da ki pulit ka UP.
Yeini da pyntip da u SP ka West Garo Hills, u VS Rathore uwa da ong leh wa da phah ya ki pulit ka Meghalaya yow wanrah ya u Bernard cha Tura.
Kam wow pynkynmoo wa ya u Bernard da pynngat ha ka takit ka Tura Women PS Case No. 105(07) 2022 hapoh ki kyndon aiñ U/S 3/4/5/6/7 ka aiñ Immoral Trafficking (Prevention) Act, 1956 hadien wa chem sabut wa em ki kaam wa pyrchah aiñ wa da leh hapoh ka Farm House u heiwa ki pulit da ksoh ki hadooh 73 ngut ki bru heiwa u ka yung bichaar u Chief Judicial Magistrate da pynmih u da ka Non-Bailable Warrant yow kem ya u Bernard wei neiliang ki pulit da phah ki ya ka Look Out Notice cha waroh ki jylla ka ri.
