Jowai: Ka Qualifying Round 1st Leg ka Meghalaya State League (MSL) 2019 kawa pynman hapyrdi ka 7 Wasa United FC (WJDSA) pyrchah yaka Ryntih Sports Club (SSA) ynne ka sngi ha Kiang Nangbah Stadium, Dongmihsngi Ladthadlaboh, Jowai da kut ko da 3-3.
Ka Ryntih Sports Club da ye ko wow pynyuiñ ya ki le ki kool wa thap ka 7 Wasa haka kylla step.
Ka 7 Wasa da yoh ko yei sdang wa bha tam deiwa thap kool nyngkong ko haka minit wa 5 lyngba u Hikaidame Bareh wei da pynbood saka kool wa ar na u Pynishai Lathong haka minit wa 16 wei da yoh ko saka Penalty Kick kawa thap da u Hikaidame Bareh haka minit wa 27.
Ka Ryntih Sports Club da ye ko wow pynuiñ ar tylli ki kool haka kylla step haka minit wa 32 lyngba ka kool wa thap u Kynsaibor Lhuid wa na u Hardy Cliff Nongbri haka minit wa 41, kamtæ ka kylla step da kut ko 3-2.
Ka kylla miet da man ko ka yong ka Ryntih Sports Club kawa da ban joor yaka 7 Wasa kawa da yaleh katwa ye wow khanglaad yaka Ryntih wow thap kool tangwa haka minit wa 83 u Bickyson Kharkongor da thap u yaka kool wa le kawa da neh hadooh wa kut ka yalehke da 3-3.
Ka 7 Wasa kattu u lai ko cha Shillong haka 22 tarik heipor 01:00 waje i sngi uni u bnai ha JN Stadium yow yachem biang waka Ryntih Sports Club yow rai kawon na ki wow yoh u psiah cha ka MSL.
Hawa yoh u yaklam wa u Arki Nongrum u CEO ka Meghalaya Football Association da ong u wa kani ka Qualifier kawa tip leh kam kam ka Play Off (Wild Card Entry) toh ka wow pynman du hapyrdi kini ki ar liang neidaw wa haka MSL ka wow pynman ha uni u snem duna ko sa kawi ka Team kamtæ da jied yaka League ka SSA kawa man ka Top League waka WJDSA kawa man kam kawa ar hei kyrdan ka League hapoh ka jylla.
Naka League ka Shillong da psiah chwa ar tylli ki Team kamtæ ka Ryntih Sports Club kawa yoh wa le da yachem ko waka 7 Wasa kawa rem Final haka Super League ka WJDSA.
7 Wasa United 
Ryntih Sports Club
Discussion about this post