Nadooh ka 21 tarik u sdang biang ki Pnar u hiar rep cha Karbi

Hadien wa mih i thut ha i rep i riang wa i khayi pateiñ hapyrdi ki Pnar wa ki Karbi iwa da neh kattu katni bnai, ynne ka sngi da pynman ya ka yalang yasuk hapyrdi ka Dorbar Chnong Khanduli waka Suching Amring Border Development Committee (SABDC) ha BOP Khanduli.

Ha ka yalang da wan sakhi u A. Laskar uwa man u Border Magistrate ka West Karbi Anglong wa u B. Langbang uwa man u Border Magistrate ka West Jaiñtia Hills.

Chwa wow sdang ka yalang da yoh i klam na u Augustine Hansen uwa man u Chairman ka SABDC wa na u D. Kharshiing uwa man u MLA warim kamjooh uwa chong chnong ka Khanduli.

Ka yalang ynne da man ko kawa lai bait heiwa da yoh ya i klam phyllu yumut hajrong kiwa boon ki bynta ya kiwa da pynsñiaw na ki dkhot ka chnong Khanduli wa ka SABDC heiwa da ban joor wow pynneh yei chongsuk hapyrdi ki ar jaitbru.

Related posts

Dawa kor ATM ka JNC ha Phramer wa ha Nangbah

November 14, 2024

Sñiawkhia ki ar seiñ wa em ki skur wym yoh ki khynnah tang u yaleh Scholarship

November 14, 2024

Ha ka yalang da rai wa yaka Check Gate ka KAAC kawa em ha Khanduli u e ha i rai ki Regional Committee ki ar jylla ka Meghalaya wa Assam heiwa heiwon u booh ya kani ka Gate.

Da rai wow sangeh i kyntoor pood hapyrdi ka Assam wa Meghalaya ha ka thaaiñ Khanduli wei ini u sangeh i pyn ha ki sngi wow wan.

Heiyatoh wa ki kot ki sla ki hali ki Pnar wa em cha thaaiñ Karbi da rai wow rah ya ki kot ki sla wow pynsakhiat yei mantre wei emhok wow rep ha kini ki hali wei ya kini ki kot toh u pynyoo ha ki bor ki chnong wa em ha Karbi wei emkaam u biang wei wow pynthymme ya ki kot ki sla neipor cheipor.

Da rai leh wa ki ar liang hawa lai mar chiliang pood ymtoh u khait palat, u khait khiar ya ki jhoor ki plung wei da khang wa ymtoh u dat Bomb næ bih ya ki um ki wah wei lada chem ya kiwa leh pyrchah daw pynchitom ya ki da ka kuna wa Rs. 50,000 wa i e kti cha ki bor pulit.

Chooh chooh da rai wym toh u pynthut ya ki kaam pynroi wa wanrah da ki sorkar jylla wei emkaam u pynbait da ki bor chnong ya kam kitæ.

Khaddooh da pynbna wa ki rai wa chim ynne ka sngi da man ki kiwa khaddooh wei neiliang ka SABDC leh daw pynsñiaw ko ya kini ki rai cha ki 32 chnong wa em hapoh yong ka wei wa ki Pnar u ye biang ki u hiar rep cha ki hali ha thaaiñ Karbi toh nadooh ka 21 tarik uni u bnai.

Neiliang u Y. Nongspung, Waheh Chnong ka Khanduli da e khublei u ya ki ar liang wa da ye u pynman ya kani ka yalang kawa jop heiwa daw ye biang u wanrah ya i chongsuk kam ki por nachwa hapyrdi kini ki ar jaitbru.