April 26, 2023
Ka jylla Meghalaya, kamwa jooh tip ya ka kam hei ktien pharæng “Abode of the Clouds” namo ka “I thaw chong-ngiah ki la’oh”, da man ko kawa da kyrkhu da u Blai la ha ki loom ki wah ka dustur riti wei kini waroh riñ ki ya kiwa uiñke suwari na kylleiñ ka pyrthai.
Nadooh ki snem wa dadep ka chnat uiñke suwari namo ka Meghalaya Tourism Department ryngkat krehlang wa ka Umiam Sailing Club, dadep pynbiang ko wow pynman ya ka tamasa Northeast Regatta wa ki kaam pynwyrngia (concert) nadooh ka 29 tarik uni u bnai hadooh ka 2 Naisan ha Umiam Watersports Complex, kawa jngaidu kamwa 20 km na nongbah Shillong.
Kani ka pung Umiam heh ko kamwa 220 sq. km wei em ko kamwa 1,000 metre næ 3,200 phut na duriaw.
Ha kani ka tamasa daw wan wai da u montri ka chnat uiñke suwari u Paul Lyngdoh, wei ha ka 30 tarik u montri rangbah ka jylla, u Conrad K. Sangma daw wan pynchlur u ya kiwa wan chimbynta heiwa da yooluti wow 80 ngut kiwa chimbynta na ki 10 tylli ki jylla ka ri, ki wow kynthup leh ya ki 12 tylli ki club ki wow chimbynta ha kini ki 5 sngi.
Daw wan chimbynta leh ka Indian Army wa ki chipai duriaw næ Indian Navy ryngkat ka UDAY FOUNDATION (kawa man kawa nyngkong ka seiñ paidbah wow hikai yah lieñ na India daw wan chimbynta ko ha kani ka tamasa).
Ka thong wa hakhmat dooh yong kani ka Boat Regatta toh wow pynchlur ya ki khynroo khyllood ha kani ka jait yalehke (sport) khnang wow yoh kreh ki lyngba kani ka yalehke deiwa chimbynta cha kiwi ki bynta ka ri.
Ha kini ki sngi daw em ki yakhun kiñ lieñ, ki tamasa rwai wei tem ryngkat wa kiwi kiwi ki kaam pynwyrngia kiwa kynthup ya i uiñke næ Nature Excursions, Camping wa i chong-lieñ.
Ka sngi wa nyngkong yong kani ka tamasa wow sdang pynchongchit da uwa rwai K-Pop Kim Woojin, ha ka sngi wa ar daw tem ka dhab na Delhi, ka Twin Strings. Daw em leh kiwi ki dhab kam ka Lynx, Ricaa Stella, Banrap, Rum & Monkeys, LB3, Young Natee, Larger Than 90, DJ Favian wa kiwi kiwi. Ym emkaam wow su bai psiah cha kini ki concert waroh.
Wow pyndap pyrtuid wow psiah cha kani ka program da sdang i nadooh ka 5:00 i janmiet yong ka 24 tarik uni u bnai.
Kam wow kdaw ha ka jylla Meghalaya man ko kawa khlan wow riñ ya kiwa uiñke suwari na kylleiñ wei du ha u snem 2019 kamwa 12.7 lak ngut ki bru da wanke ki cha ka jylla wei da yooluti wa hadooh u snem 2024daw kynjoh i cha ka 15 lak.
