Ha i sien wa san, ka yungmane ka Balang Presbyterian Umdihar, Ri-Bhoi District da chah khyndang chah tooh biang ko ha ki bru wym ye u tip iwa da chem ynne i step iwa ye u jia heipor synyaaw.
Kini ki bru da yoh ki wow psiah chapoh ka yungman lyngba kawi ka khian dwar deiwa khyndang yabor ka wei da rah ki yaka poisa wa ki tiar wa pynemkaam yong ka Balang.
Mar ya tip yeini wa jia, ki Tymmen Wasan yong ka Balang Umdihar da pyntip paidbah ki wei da khut pynman yaka yalang wa jhan yow pyntip paidbah ya ini wa jia.
Ha kani ka yalang, ki manbei manpa deilang wa kiwa kitkaam Balang da pynsñiaw ki yei mynsien wa sñiawsih yow tip ya kani ka khubor.
U Tbn R.B. Shadap, da khana u wa ini i chah tooh kani ka Balang toh ka sien kawa san heiwa kiwa tooh da psiah yabor ki cha ka yungmane wei da rah ki ya ki mar ki mata yong ka Balang tangwa ha kani ka kynti kini kiwa tooh da khyndang yabor ki ya ki dwar wa ki Almari booh kot booh sla wei da tympra lut ki ya ki tiar ki tar.
Da khana u leh wa kiwa tooh da rah ki leh ka poisa kawa da yoh deiwa lum kynchew na ki yaseiñ khynnah wa kiwi kiwi ki yaseiñ wei ya ki muna thap poisa kynchew da noh phrai cha khyndaw.
Chooh chooh da khana u wa kiwa tooh da rah ki ya ka khuri dih Wine yong ki Pastor wa pynemkaam heipor wa pynman yaseiñ Sacrament deilang wa kiwi de ki tiar wa sy’at dor.
Da pyntip leh wa yeini wa jia, neiliang ka chnong Umdihar daw lai ko wow ujor cha ki pulit yow pynman yei takit khnang yow chem ya kiwa emkti.
Discussion about this post