U Montri ka sorkar jylla uwa man leh kam u MLA ka Jowai, u Wailadmiki Shylla, ynne ka sngi da khut yalang u ya ki waheh chnong ka sor Jowai ha Conference Hall u DC neibynta u yachem u ya pyrkhat bniah ya ki kaam pynroi hapoh ka chnong Jowai heiyatoh wa i sahkut kari, i rukom pynyakhlaad yei jhep, i pynkhooid ya ka wah Myntdu wei heiyatoh wa ki ksaw wa khlem tre.
Ha kani ka sngi da emlang leh u DC ka West Jaiñtia Hills District, u Abhinav Kumar Singh, ka SDO Sardar Jowai, ka Vevotolu Kezo, ka D.V. Lyngdoh, Additional Deputy Commissioner kawa man leh ka CEO ka Jowai Municipal Board, neitæ u sahep ka chnat District Transport Officer, West Jaiñtia Hills, u sahep na ka chnat Traffic ka Jowai Police Station wa kiwi.
Hawa klam wa kiwa thoh khubor, u Wailadmiki da ong u wa heiyatoh wa i pynkhlaad yei jhep hapoh ka chnong ka thaw, sñiawsuk u wow tip na ka CEO ka Jowai Municipal Board hajrong i yakrehlang ki dorbar chnong wow pynyakhlaad hapyrdi i jhep wa pyut wa i wym pyut. Yaroh u leh ya ki dorbar chnong kiwa e kyrchaan neibynta u pynyakhlaad yei jhep. Heijooh i por khana haroh u wa i pynkhreh yei thaw noh jhep dang lai i chakhmat.
Hajrong ka mat yong ki ksaw sarok won ong u kamwa da e hukum da ka yung bichaar wa hakhlieh dooh ka ri, kamtæ da yaklam wei da em ki laad ki luti wa daw chim neiliang ki bor District.
Heiyatoh wa i sahkut kari leh khana u wa da pyrchang thooh laad ki kammon u pyntikna yei lai bait ki kari.
Chooh chooh kamwa da em boon ki sarok hapoh Jowai nadooh ki warim wa kiwa dang thymme, u Wailadmiki da e yumut u ya ki waheh chnong wow booh pyrtuid ya ki sarok hapoh Jowai khnang yow pynsuk ya ki paidbah u tip ki wa lada lai na utæ u sarok yow ye u mih heitæ i thaw. Wei ini i thmu booh pyrtuid leh man i chibynta u pynsahnaam ya ki bru waheh, ki bru bna naam ka chnong Jowai, ka Ri-loom Jaiñtia wa ka jylla.
Neitæ heiyatoh wa i thmu pynkhooid ya ka wah Myntdu neibynta iwa jrong 14 Km, ong u ym slem de u leh yeini deiwa yooluti u em hadooh kamwa 5000 ngut ki paidbah wa chimbynta.
Discussion about this post