Da: U Enrico D Pasi
Da yoo lakam ki Politician wa kiwa pynman Housie da pynemkaam ki da ki jooh ki buit ki budia yow phon ya ki paidbah deiwa tem da ki sur wa kynjot wa ki pynwyrngia yow pynbang heithaw wow pait ya ki kaam wa emkaam. Wei hawa leh kamni man ko du wow pynwit ya ki bru yow lait ki wow pait ya ki kaam wa emkaam wa chon wa khia.
Kiwi de ki kaam pynwyrngia nadooh ki yadaw masi, ki Lucky Draw, ki yakob khwe wa kiwi de ki kaam pynmih poisa daw wanrah i yei rukom pyrkhat yow yoh u mahajon smat wei hadien habood daw ktah ko ya ka yung ka sem manda ya kdong ya kam kini ki kaam wei daw ktah ko leh ya ki kaam poisa poilaiñ ka yung ka sem. Tangwa wot hawa tip yeini, kiwa boon dang pteiñ ki wow chongchit wei wow chah rah ha kani ka laær deiwa chah ktah joor bha.
Ka wyrta chula yong nga cha waroh toh wym em ka luti wa suk ka luti wa tbian yow poi cha ka thong lait nei kreh chitom wa i chim ya ki rai wa em i kitkhlieh. Neibhah emkaam wow tip iyi wa yang lada embynta ha ki kaam wa pynmahajon smat heithaw wow pyrkhat jngai yeiwa emkaam hei longbru manbru, ha ka yung ka sem, i heh i san kam ki manbru kamjooh i skem ki kaam poisa poilaiñ.
Nga burom O ya ki bru ka Jaiñtia Hills kiwa skem ki thied wow yarap ya ka imlang sahlang wei lada ki kyntien O ktah ko yei sñiaw yong phi, nga paan maap chwa O tangwa ngait skem O wa emkaam wow klam ya ki kaam wa ktah ya i waroh.
Kam ka imlang sahlang toh u booh i hakhmat ya ka puræ puthi, i stat wow pyrkhat wei wow man kam ki bru wa em i kitkhlieh wei deiwa leh kamni daw ye i wow man kam kiwa chong chnong wa stat kiwa tip wow burom para bru yow man leh ki bru kiwa im katkam i sap i tap wa em ha i.
To u ya krehlang yow man kam kitæ kiwa pynchlur yei kreh chitom, i man hok, kiwa tip u burom markylliang wei wow yait na ki jait kaam wa daw ktah ya idæ wa kiwa maya i.
Discussion about this post