Shillong: Kiwa khayi wa kiwa dai dakha ha ka jylla, da pynsñiaw ki yei kmen hadien wa ka sorkar da pyndam ko yei khang wow wanrah dakha na baar jylla, kawa da kut ynne ka sngi wei nadooh myntu i dai ya ki dakha wa wan na baar jylla u sdang biang i kamwa jooh man.
Hawa yaklam wa u President ka Khasi Jaiñtia Fish Wholesellers and Retailers Association, u Mitchell Wankhar da ong u wa kiwa khayi dakha da sñiaw kmen ki hadien wa da pynlait biang wow wanrah ya ki dakha na baar jylla hadien wa ka sorkar da khang noh ko kamwa chi bnai neidaw wa chem wa em ki dakha kiwa da Inject da i dawai Formalin wow pynneh slem ya ki.
“I khang ya ki dakha kattu la kamwa 30 sngi da ktah joor i ya ka kamai yong i kiwa dai dakha, wei i sñiawkmen wa kattu da pynlait biang ya ki,” da ong u Mitchell.
“U man ko kawa bha wa ka sorkar wow sylli bniah ko ya ki dakha man i por kiwa wan na baar jylla khnang wow lait iwon iwon i eh khamtam heiyatoh wa i chait i khiah kiwa baam,” da ong u Wankhar.
Ki dakha ym pu em poi ki ynne ka sngi neidaw wa haap yang chwa ya ki neibhah wa wanrah ki na jylla Andhra Pradesh, West Bengal, Assam wa kiwi wei nadooh mynstep ka yaaw dakha u sdang biang ko wei katkam wa pyntip u Wankhar da ong u wa i dooh nong da poi i chadooh ki phaw lak chi sngi.
I emkaam dakha hapoh ka jylla da poi i hadooh 25 ton chi sngi tangwa katkam wa kam u Wankhar da ong u wa sñiawphylla u wa em ki dakha wa wanrah na Assam heipor miet da noh ya ki hapoh ki nan dakha wa em ha ka thaaiñ Umsning wei da tong won wow dai ya ki heipor wa khang dai dakha.
“Ini i leh tooh da che bha i wei da em kiwa chim kabu wow kaam wa kini ki dakha toh kiwa mih napoh ki nan wa em ha Ri-bhoi.” da ong chooh chooh u Wankhar.
Discussion about this post