15 49.0138 8.38624 1 0 4000 1 https://wyrta.com 300 0

Nadooh u snem 2011 em 1038 tylli ki kaam chah thombor ki kynthai ha ka jylla: NEN

0 Comments
Advertisement ad1

Shillong: I chah thombor ki kynthai ha ka jylla Meghalaya khamtam heiyatoh wa i chongkha chongman da joor bha i ha kini ki sngi katkam wa chem ka North East Network (NEN) deilang wa ka Meghalaya State Commission for Women’s (MSCW) wa kiwi ki chnat kiwa da puræ bniah ya kani ka phang.

Hawa yaklam wa ka Programme Manager ka NEN, ka Joy Grace Syiem da ong ko wa du hapyrdi u 2011 hadooh uni u snem, em palat chi hajar ngut ki kynthai kiwa chah thombor hapoh yung wei kiwa boon hi toh nei chongkha chongman.

Advertisement ad1

Da ong ko wa katkam ka yutip na ‘Ioh Lynti’ kawa ha Ganesh Das Hospital, em kamwa 1038 tylli ki kaam wa chah thombor ki kynthai ha ka jylla nadooh u snem 2011, tangwa kiwa boon hi ym em paw ki, wei sa iwi tawon i daw toh wa ha kani ka jylla boon i chah thombor toh neidaw wym biang ki thaw wow booh ya ki, heiwa lyngba i puræ bniah da yoh wow tip wei wow sñiaw na ki kynthai.

Da ong ko wa emkaam bha wow em ki thaw wa chngaaiñ ya ki kynthai wow sah wei emkaam leh wow chimkhia ya ki kynthai wow lait ki na i sih kam ki drugs wa kiwi kiwi.

“Kini ki kynthai da pyntip ki wa sah ki ha ki thaw yang bus, wei neidaw wa chem chitom ki da leh ki ya ki kaam tooh du wow yoh u lai sah patok wa rap chngaaiñ,” da ong ka Joy.

“Hadooh u 2018 ym em ki thaw booh ya ki kynthai ha Meghalaya. Hawa ka NEN pynman ko yei thooh bniah da chem wa em du kawi ka Swadesh Greha ha ka jylla wei boon na ki kynthai yoh ki u rieh tngen ha ki thaw wa khynnia,” da ong chooh chooh ka Joy.

Katwa kamtæ emkaam bran-bran ya ki thaw wow sah ki kynthai ha waroh ki district kamjooh leh ki thaw sah ki kynthai wa chah thombor.

Ka Joy da ong ko wa em i thaw wow booh ya ki kynthai du ha East Khasi Hills wa Nongstoin, wei ka sorkar chem chitom ko wow yoh thaw wow chna ya kam kitæ ki thaw sah ya kiwa chah thombor.

“Da yaklam i wa ki Professor ka NEHU wa ki bru paidbah hajrong i wym em ki Shelter Home, i daw wa pynsñiaw ki wa toh ka jaitbru kawa chim jait na ka kynthai neibhah ya ki kynthai da chimkhia da ka kur,” da ong ko.

Ka Joy da ong ko wa boon ki kaam thombor ya ki kynthai toh ha ka chongkha chongman wei man i iwa eh neibhah wa ha India ka aiñ ympu kheiñ pyrchah aiñ ko yeini lait noh wow ujor da ka IPC.

“Ki kaam chah thombor ki kynthai ha ki yung ki sem toh neidaw wa laitlooid uwa leh, i man khlieh bor u chynrang, wa i duna i stat i tip wei ki khynnah yohlaad ki wow pynemkaam drugs wa kiwi ki jait dih pynmuaid,” da ong ko.

Chooh chooh da ong ko wa lyngba i krehlang wa ka Women’s Commission, daw e ko da ka dorkhat cha ka sorkar wow chimkhia ko hajrong kani ka phang.

Da pyntip ko leh wa kiwa chah thombor, kynthup ki ya kiwa kreh sorkar, kiwa kreh yung bru, wei da em leh ki kynthai kiwa chah dai ha u kurim yow dai ki yei doh i pran yong ki yow yoh u wow thied drug.

Neiliang ka Chairperson ka MSCW, ka Theilin Phanbuh da pyntip ko wa em ar tylli ki thaw booh ya ki kynthai ha ka jylla wei emkaam wow wan ki chakhmat wow chim ya kani ka lyngkor.

“Kani ka kaam man ko kawa khia wot hei miet leh haap wow mih hawa em ki kaam, tangwa nga kyntu O ya kiwa kreh monsñiawbha wow wan chakhmat wow chim ya kani ka lyngkor,” da ong ka Chairperson.

Advertisement ad1

0 Comments

Leave a Reply