Ka Dr. Mebalarisha H. Paswet kawa man kam ka Dentist hawa e yei klam ha ka yalang pynkup burom da ka Kur Sookpoh Khad-Ar Wyrnai, Jowai kawa da pynman ha ka 14 tarik uni u bnai da khana ko yei lai luti ko wow pyndep yei puræ puthi najrong i pynthut ka khlam COVID-19 deiwa wan won sa ka thma Ukraine.
Da khana ko wa hadien wa pyndep ko ya ka Bachelor of Dental Surgery (BDS) wei da lai leh ko ya ka Clinical Research wei da wan biang ko cha Jowai hachwa wow wan ka khlam COVID-19 wei da mut ko wow booh ya ka Clinic tangwa da sepai noh kani ka thong.
Ha ini i por wa chong hi-eh ko da pynpyrkhat ya ka wow pyndep ko ya ka Master Degree neibhah da chong sangeh la le snem nadooh wa pyndep yei puræ puthi wei ha kawi ka sngi da chlur ko wow khana ya bei wow pa wow lai puræ Master noh wei ki leh da pynchlur ki ya ka wow leh yeini.
Hawa thooh thaw puræ da yoh ko hapoh ka ri Ukraine wei ini toh i por wa joor bha u COVID-19 hadooh wa tang u li booh ko ha Delhi leh ym yoh wei da lai ko samen nadooh na Guwahati hadooh wow poi cha Ukraine.
Hawa sdang yei puræ puthi wei suki suki da sdang wiar u COVID-19 da sdang suk tangwa wan won da ka tham iwa dang saja chooh chooh wei da hap ko wow liwan cha yung wei ini da man heipor wa dang lai Second Year ko wei da pyrkhat ko wa jan kattu da sepai boi wym ye de u pyndep yei puræ puthi neibhah ka thma ym yoo dur u wiar ko.
Tangwa da yoh won ko ka laad wow em hei thaw wa man chngaaiñ bha ha Ukraine wei yow poi biang cha Ukraine ymtoh iwa suk deiwa hap kaap boon tylli ki pood ki ri tangwa da lait ko na iwon iwon i jia wa sñiawsih hadooh wa da yoh wow pyndep yei puræ puthi.
Wei kattæ da yoh ko wow wai ya ka Clinic yong ka kattu la chi bnai ha Iawmusiang Jowai.
Discussion about this post