Ynne ka sngi ka JHADC da pynman ko ya ka Dorbar Kyrpang namo ka Special Session wow wanrah ya ka Resolution wow tyrwa cha ka sorkar pyrdi wow pynkylla ya ki aiñ wow ye u tih mooyong hapoh u pood yong ka.
Ha kani ka Dorbar, ka Executive Committee da pdiang ko ya i tyrwa wow pynkylla ya ki kattu katni ki bynta ka Resolution wa e da ka Liang Pyrchah hapoh ka Council.
Hadien ka dorbar hawa yaklam wa uwa yahkhmat ka Liang Pyrchah, u Andrew Shullai da ong u wa ynne ka Resolution toh wow kyrpaad ya ka sorkar pyrdi wow pynkylla ya ki aiñ tih mooyong wow yahaap wa i rukom leh cheini wei ya kani ka Resolution ka Liang Pyrchah leh da kyrchaan bha ko ya ka.
Da ong u wa da yooluti u yeini nadooh i por wa dadep heiwa ha u 2015 ka sorkar jylla da rah ko yeini i kaam iwa da chah kyntait ha ka sorkar pyrdi wei i yajan ka sorkar MDA-I man iwa joor bha wei ymtoh iwa eh wow pynkylla ya kini ki aiñ heiwa na ki snem wa dadep ym em iwa chimkhia yeini.
U Andrew da ong u wa ynne manda poi ha Dorbar da yoh syndet ya ki kot soohlang (Annexure) heiwa da thoh bñiah iyi kwah ki wow pynkylla heiwa ya kam kini ymtoh u phah pyn ynne neibhah ki MDC emkaam ki kattu katni sngi wow puræ bñiah ya ki, heiwa wot kiwa em ha ka Liang Synchaar leh ym em yoh ki ya ka.
Da khana u wa iwa wit ki wa toh wa ha kani ka Resolution da em le kyrdan kiwa khih mooyong, kawa nyngkong toh ki bru samen, kawa ar toh ki kiwa krehlang katwa kawa le toh ki karkhana heh yeiwa ki kam ka Liang Pyrchah da kyntait joor ki wow em ki karkhana heh neibhah emkaam u yoh khih yoh kreh ki tre ri ymtoh kiwa na baar.
Sa kawi ka bynta wa pyrchah toh katkam i yachem wa ki seiñ khih mooyong kam ka Jaiñtia Coal Miners Association heiwa da e dorkhat (Proposed Coal Mining) ki cha ka sorkar wow tyrwa wow em i thaw wa heh (Maximum) hadooh 5 Hectare wow tih mooyong, heiwa ka Council ha ka Resolution da thoh ko wa i thaw wa khian (Minimum) u heh i toh chi Hectare iwa man kamwa chi lak sq ft heiwa em ki bru kiwa ym em i thaw wa heh kat deitæ kamtæ da pynpyrkhat ya ki wei da pynkylla noh cha ka 0.5 Hectare.
Heiyatoh wa ka dan (Royalty) leh da pdiang wow pynkylla wow e u pyrkhat da ka sorkar jylla wa ka District Council.
Hadien wa pyrkhat bha ya kini kiyi waroh da rai wow kyrriah por (Adjourn) wei da pdiang yei tyrwa pynkylla ya kini ki bynta ka Resolution heiwa ynne da em i krehlang hapyrdi ka Liang Pyrchah wa ka Liang Synchaar.
U Andrew da kyntu u leh ya ka EC wow booddien won ya ini i kaam hadien wa da pdiang ya ka Resolution.
Discussion about this post