Manda em kiwon kiwon kiwon kiwa chitom ha yung ha sem, waroh da khuslai da khian mynsien. Wei ini da jia leh ya ka yung u Arphon D Marak, u pulit Constable ha Tura Police Station wa ka kurim yong oo kiwa da khuslai ya ka khon wa dang chi snem chiteiñ yong ki, ka Chuesa Amora R Marak kawa jngem ki pariam kti, ki tyrsim wa ki snieh ktien.
Neiliang kiwa hayung da lai yah ki ya ka khon cha Tura Civil Hospital yow lai phah sumaar heiwa da chem wa kjut klongsnaam ko namo ka Congenital Heart Disease (CHD), kamtæ da phah smat cha Shillong yow yoh yei sumaar wa rap paka.
Neiliang ki Doctor ha Shillong da e yumut ki wow pooid smat tangwa ki bei ki pa ym kwah ki wei da kwah ki wow sumaar khlem pooid.
Katkam wa thooh bniah da ka Paediatric Cardiac Society of India (PCSI), da antaad wa ki khonboo wa da kha kiwa em i chitom klongsnaam da em ki palat 2 lak ngut ha chi snem wei da emkaam ki wow yoh yei sumaar ha u snem wa nyngkong ki yow ye ki u heh u san khlem thut.
“I wym yoh laad sumaar da iwa paka boonsien toh neidaw wa duna i pynche, i rukom pyrkhat ki bei ki pa wa kamjooh i dooh i duk,” da ong u Ramkumar S, IAS wa man leh kam u Director National Health Mission ka sorkar jylla.
Hawa kyruiñ biang cha katai ka khynnah, hadien wa ymye ko wow lai leh wot hadien ar snem i rta, ki bei ki pa da yah noh ki ya ka cha District Maternity and Child Hospital kawa em ha Tura wei da phah ya ka cha ki Specialist yong ka District Early Intervention Centre (DEIC) kawa haap hapoh ka Rashtriya Bal Swasthiya Karyakram (RBSK).
Neiliang ka sorkar jylla hapoh i yahkhmat yong u Montri Rangbah ka jylla, u Conrad K Sangma kamjooh u Montri i Chait i Khiah ka sorkar jylla, u James K Sangma da chim ki boon ki laad ki luti wow yakhun ya kini ki jait kjut. Kamtæ hadien wa chem ki wa emkaam sumaar wa rap kyrpang neibynta kitu kiwa yoh ya ka CHD, wut wut da soi ya ka soskular wow krehlang wa ki Hospital wa paawnaam kam ka Apollo Chennai, Apollo Guwahati wa ka Amrita Institute of Medical Science (AIMS) wow booddien yei sumaar neibynta waroh kitu kiwa chitom klongsnaam (Paediatric Cardiology) kiwa da chem lyngba ka DEIC hapoh ka Scheme RBSK na ka jylla Meghalaya.
Ya kitai soskular MoU da soi hapyrdi ka RBSK, National Health Mission (NHM) Meghalaya wa ha Apollo Hospital Enterprise ha u Naisan 2022 ha ryngkat i emlang u Ram Kumar. S, IAS, Additional Secretary ka Directorate of Health & Family Welfare wa Mission Director, National Health Mission (NHM) wa ka AIMS won ha u Naiynñiaw 2022.
Kamtæ hawa kyruiñ biang sa chisien cha katai ka manyung, neiliang ki Doctor, ki Social Worker ha DEIC da ya syllok ki wa ki bei ki pa yong katai ka khynnah wei kammon u ye ki wow yarap wei wow sumaar smat. “Neiliang yong ki wakreh ka chnat da pyrchang ki wow pynsñiawthooh ya i kammon wow leh wa kiyi ki kyndon kiwa hap u lai lyngba hachwa wow sumaar wei da smat ki wow jubab lut yeiwa sñiaw artatien yong i,” ong u pa yong katai ka khynnah.
Neiliang ka DEIC da dep ko wow pait u sylli hadooh kamwa 1,78,000 ngut ki khynnah khian ha u snem wa da dep du ha ri-loom Garo. Ya ki khynnah wa chitom malu mala da phah cha Civil Hospital wow yoh yei sumaar tangwa neibynta kitu kiwa rap joor won kam ka CHD, Corneal Opacity, Cleft Lip wa kiwi da phah cha ki thaw sumaar kiwa rap biang kam ka North Eastern Indira Gandhi Regional Institute of Health and Medical Sciences (NEIGRIHMS) Shillong, Bansara Eyecare Centre, Amrita Institute of Medical Sciences and Research Centre (AIMS) Kochi wa ha Mission Smile, Guwahati.
Katai ka khynnah leh da man ko kawi na ki 14 ngut ki khynnah na ri-loom Garo wa em yei kjut klongsnaam (CHD) kawa da phah wow yoh yei sumaar lyngba i leh Examine ka DEIC ha Tura. Ya kitai ki khynnah da summar/pooid da ki Doctor wa paawnaam ha ka ri ha AIMS, Kochi katkam ka MoU wa da soi hapyrdi ka sorkar Meghalaya wa katai ka Hospital.
“Hapoh kani ka RBSK Scheme, i lut i sep wa kynthup ka bai lai bai wan, wa ka thaw sah wa ka thaw sumaar da pynbiang lut neibynta kiwa kjut,” ong u Johnson J Nongbet, State RBSK Consultant, NHM Meghalaya.
Chi bnai hadien wa sumaar, da man iwa mih soh ya katai ka khynnah. Ka bei yong ka dei kmen wa khroo wym ye de u batai da pait ko ya ka khon kawa da ye u yalehke wa ki lok ki jor. “I da dep i wow lai booh ya ka ha ka Play School katni,” ong ka bei da i durkhmat wa kmen wa i mynsien sñiawngooh.
“Hadien wa da dep pooid, i jngem ha i sniehdoh yong ka khon leh da wiar i, nga da kmen sakhiat O wow yoo wa ka khon yong nga da sdang ko wow lai wei wow yalehke kamwa man lang kiwi ki para khynnah,” da ong ko.
Ka bei wa u pa hadooh katni dang pteiñ ki wow lai cha ka DEIC wow Check Up ya i khon wow pyntikna wa ka khon yong ki u yoh ko yei chait i khiah wa pura kamwa man lang kiwi.
