Ha ka Result ka Secondary School Leaving Certificate (SSLC) Exam, 2023 wa da pynbna da ka MBOSE ynne ka sngi. Ha ka thup ki 20 ngut kiwa poi chakhmat dooh, da mih i pyrtuid ki khynnah wa em 5 ngut kiwa lai puræ ha ki skur wa em ha Jowai.
Na kini, kawi toh ka Sanikawan Challam kawa lai skur ha Q.C. Springside Higher Secondary School, Jowai kawa da yoh ya ka kyrdan wa 13 deiwa yoh Distinction ha ka English, Mathematics, Health & Physical Education, Science & Technology, Social Science wa Khasi heiwa ha ka Health & Physical Education da yoh ko 100 na 100.
Ka Sanikawan toh ka khon u Ohiwan Lamar waka Maryoda Challam kiwa sah ha Chilliangraij, Jowai wei man ko leh kawa da mihkhmat ya ka West Jaiñtia Hills District ha ki yakob dro dur hapoh ka jylla wot hadooh ya ka jylla hapoh ka ri wei da jop ko leh ya kiwa boon ki yakob dro wei man ko leh kawa da chah jied ha ka State Talent Search Examination in Mathematics & Science ha u 2021 wa pynman da ka Directorate of Educational Research & Training ka sorkar Meghalaya.
Neiliang u Principal ka skur, u Agate Chullai da khana u wa kani toh ka sien wa le wa da mih pyrtuid ki khynnah ka skur hapoh ka thup Top 20 ka SSLC, kamtæ da pynsñiaw u yei kmen wa kam ka skur da yoh biang ko wow khait ya u soh i kreh chitom nadooh kiwa sikai skur kamjooh leh ki khynnah skur kam ka Sanikawan kawa nadooh Class-I da wan ko ha kani ka skur wei da pynyoo ko yei sap ko deiwa yaknieh wow yoh nyngkong bait ha kawon kawon ka Class wei kawa da tip bait yei kaam yong ka kam ka khynnah skur.
Da ong u leh wa ka Sanikawan da wanrah burom ko ya ka skur deiwa mihkhmat chadooh cha Delhi ha ka yakob dro dur kamjooh leh hapoh ka jylla wei ha ka puræ puthi leh da pynoo ko yei sap nadooh wa dang khian ko, kamtæ oo da yooluti hi u wa daw poi hi ko cha ka kyrdan wa yoh ko.
Neiliang ka Sanikawan da ong ko wa i pynkhreh toh waroh chi snem hi wei manda jan ka Exam te rap pynjoor ko u kreh kot kamwa 8 kynta chi sngi tangwa deiwa kheiñ yonglang nadooh wa sdang da man 4 kynta chi sngi wei i thrang ko toh yow lai puræ Science wei wow man Doctor.
Neiliang u pa ka Sanikawan da ong u wa da dooh thiah nadooh ynnin i miet neibhah da yoo wa ka khon toh kawa kreh chitom nadooh dang khian wei ynne da yoh ko ya u soh i kreh chitom ko wei da pynchlur u wow nang kreh chitom chooh chooh ko neini chakhmat yow nang yoh ko wow khait chooh ya u soh wa rap thiang ha i im yong ka.
Heiyatoh won wa i sap yong ka wow dro dur, da ong u wa ini toh kam ka Sport neibhah heipor wym em man skur ym em ptai i chong yung neibhah ki khon u waroh toh kiwa em ya ini i sap tæ da ye ki wow pynlut yei por wow dro dur.
Ka Sanikawan da wan ko na ka yung wa nadooh u pa, u payu, u diah toh kiwa em i sap u dro dur heiwa hadooh ha ki kamra yung leh da pynriam da ki dur wa da dro da ki hi kamjooh i pynwandur yow pynmiat ya ka yung ka sem deilang wa u pa.
Ka Sanikawan da khana ko wa najrong ki dur ka bei rymaw, dro ko leh ki dur yong ki bru namo ki Portrait heiwa iwa nyngkong dooh iwa da dro ko toh i dur yong u Principal warim ka skur wa ya kiwa emyatoh kamjooh ki lok ki jor wei da leh ko yeini ymtoh deiwa chim dei dor.
