Hadien wa mih i pyrchah na kiwa boon, ynne ka sngi won sa ka seiñ Khun Hynñiewtrep National Awakening Movement (KHNAM) da yachem ko ya u montri rangbah ka jylla, u Conrad K Sangma wow pyrchah yei thmu ka sorkar wow chna ya ka Shopping Mall ha Barik, Shillong heithaw wow em da ka thaw sahnaam namo ‘Iconic structure’ kamwa da thmu da ka chnat pynroi sor rap nachwa.
Hadien ini i yachem, neliang u THS Bonney uwa man u General Secretary ka KHNAM da ong u wa hadien wa mih khubor hajrong ini wow chna ya ka Shopping Mall ha Barik, neiliang ka KHNAM da e yumut ko leh wow chna noh da ka thaw pynyieñ kari wow pynduna yei khynñia ha sor, wei wow em leh kiwi ki jait chna wow myntoi ki paidbah.
Da pyntip u leh wa neiliang u Conrad da pynche u wa ka sorkar em ko da iwi i thmu wow pynemkaam ya ka thaw ka PWD ha Barik, neibynta wow myntoi ki paidbah deiwa pynrap leh wa ini i kreh ymtoh na ka Project yong ka Smart City.
Chooh chooh neiliang u Bonney da ong u wa i pyrchah wow chna ya ka Shopping Mall toh neidaw wa ym myntoi ko wei hawa pait yei khynñiaw ka sor deiwa ong leh wa sa iwi i daw wa pyrchah yeini toh wa em ko hajan ka Shillong Civil Hospital wei ym miat i ya kiwa kjut namo kiwa phah wan sumaar ha Civil.
