Neidaw wa nohtai ka sorkar jylla wa ka sorkar pyrdi kulmar ka SC wow e rai hajrong u mooyong

Jowai: Heiyatoh wa i chah khang wow tih mooyong hapoh ka jylla Meghalaya da ka NGT, ka Supreme Court da chong bichaar ko ya kani ka mukotduma ha kani ka 13 tarik wei ha ki le tylli chwa i chong bichaar ka Supreme Court da phah ko ya ka sorkar pyrdi wow e ya ka Report ya ki laad ki luti wa da leh lang wa ka sorkar Meghalaya waka sorkar pydi heiyatoh wa i tih mooyong.

Kam wow pynkynmoo, ka sorkar Meghalaya da paan ko na ka sorkar India wow pynlait ya ka jylla na ki aiñ tih marpohkhyndaw kam ka aiñ MMRD Act yow ye biang u tih mooyong kamwa jooh.

Hawa jubab ya ini, ka sorkar India da ong ko wa ka sorkar ym em yieñ skem ko heiwon heiwon i rai yong ka iwa da pynkylla ko na ki por cha ki por kamtæ da chem chitom wow chim ya kawon kawon ka rai.

Hawa klam pyrchah yeini i jubab ka sorkar India, u muktiar yong u Lber Laloo uwa yaleh mukotduma ha ka Supreme Court neibynta kani ka kaam da ong u wa ymtoh ka sorkar jylla kawa ym em sñiaw tikna toh ka sorkar pyrdi kawa ym em sñiaw tikna heiwa nyngkong da ong ko wa ki aiñ tih marpohkhyndaw ym em krehkaam ki hapoh ka jylla Meghalaya tangwa katni won da ong ko deiwi tawon.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ka 07-05-18 ka sorkar India da e ko ha khmat ka Supreme Court ya ka Report wa ym slem de daw chim ya ka rai wa khaddooh ka wow toh u pyndep hapoh le bnai naddooh u Naisan (May).

Ka Supreme Court da ong ko wa da joor wa sahkut kani ka kaam wei da yooluti wow chim noh ya ka rai wa khaddooh ha ka 30-07-18 tangwa ka sorkar India ha kani ka tarik da ong won wa daw emkaam ko sa ar sngi wow e ya ka rai wa khaddooh iwa da e laad leh ka Supreme Court.

Ha kani ka sngi da em leh ka seiñ wa tip kam Ka Hima Nongstoin Land Owners, Coal Traders and Producers Association kawa da wanrah ya ka mukotduma yong ki yow paan bor wow chalan ya u mooyong uwa da dep tih wei da paan bor ki leh wow sooh lang ya ka mukotduma yong ki waka mukotduma u Lber Laloo heiwa ka Supreme Court leh da e bor ko.

Kamtæ ha kani ka 13 tarik ka sorkar India da pyntip ko hakhmat ka Supreme Court wa ya ka Report wa da dadep phah cha waroh kiwa emkaam wei neini cha khmat ka Supreme Court da ong ko waroh ki mukotduma kiwa yatoh wa ini i kaam wow sooh lang waka mukotduma u Lber Laloo wei daw chong bichaar biang ya kani ka kaam hadien ar tayaw kawa ye u man ha ka 31 tarik uni u bnai.