Neidaw wym biang i rukom sumaar ha Civil Hospital Ialong, kyrriah ya kiwa mynsoo cha Dr. Norman Tunnel Hospital

Jowai: I tlot i rukom krehkaam ka Jowai Civil Hospital Ialong da mih pyrthai biang i ynne ka sngi hadien wa jia i yatyrrah kari hapyrdi ka Maruti Alto kawa em u No. ML 04 C 2363 wa kawi ka truck wa em No. AS 01 HC 9121 ha u sarokbah NH 44 ha Tuberkmaichnong, East Jaiñtia Hills.

Ha ini i jia kiwa sakhi da ong ki wa kani ka Alto wa wan neiliang Ladrymbai da chah tyrrah ko ha kani ka truck kawa wan neiliang Jowai wei kani ka truck man ko kawa da pynhær smat weiwa wan ko na i liang wa bakla.

Hadien ini i jia kiwa lai luti na uni u sarok da yarap ki wow pynkit ya ki ar ngut wa mynsoo kiwa em ha kani ka Alto cha Jowai Civil Hospital Ialong yow chah sumaar ki.

Kini ki ar ngut toh kiwa na Jalaphet wa tip kam u Son Chyrmang uwa 29 snem uwa yah ya ka kari wa u Dimar Chyrmang uwa 23 snem i rta.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong wa manda poi ha Jowai Civil Hospital Ialong heipor kamwa 9:30 i step da sylli ki ya kini ki ar ngut kiwa mynsoo wei da pyndait ha ki du ya ki drip donhi katwa ym em u leh ya kawon kawon ka sylli bniah kam ka X-Ray, ka Scanning wa kiwi kiwi, wei manda kylli ki tre yung da ong wa ha ka Sunday duna ki Doctor wei ym em kiwa leh ya ka X-Ray.

Hadien ini da pynkit noh ya kini ki ar ngut kiwa mynsoo cha Dr. Norman Tunnel Hospital (Mission Hospital) Jowai yow yoh yei sumaar wa paka heipor kamwa 12:00 waje i sngi.

Mar ya poi ha Dr. Norman Tunnel Hospital da leh ya ka X-ray heiwa da chem wa u Dimar da takha u ha tympha u katwa u Son won da chem wa da takha i Dohjem u.

U Graham Lyngdoh uwa man kam uwa yatoh wa kini ki ar ngut heijooh i por leh kam u Waheh Chnong ka Tuber Kmaichnong hadien wa jia ini waroh uwa sakhi yeiwa jia nadooh na Civil Hospital da beiñ joor u yeiwa wym em doctor ha Jowai Civil Hospital Ialong kawa man kawi na ki thaw sumaar kawa yooluti bha ki paidbah wow yoh yarap ki tangwa neidaw wa duna doctor wa kiwa leh X-Ray ha kani ka sngi (Sunday) khamtam ha ki kaam wa emkaam bran bran (Emergency Case) ym ye ki u leh yeiwa emkaam.

Da ong u leh wa lada toh iwa biang ka Superintendent kani ka thaw sumaar toh u pait ko yei wym em wa leh Ki X-ray (Technician) ha kam kani ka sngi (Sunday) heiwa ye u pynsah namo ye u dooh yei mynsien bru.